Paxıllıq hissi adətən daxili boşluqlardan doğur. İnsan özünü dəyərsiz hiss etdikdə başqalarının uğuru insana "məndə nə çatmır?" hissini yaşadır. Bu da zamanla paxıllığa çevrilir.

Bu barədə psixoloq Əbdül Səlimli AVESTA.AZ-ə açıqlamasında bildirib. Mütəxəssisin fikrincə, bir çox valideyin övladlarına həmyaşıdlarının uğurlarından örnəklər verib onlara düzgün təhsil və istiqamət verməyə çalşır.

"Bu halda "bax filankəs daha yaxşıdır" deyə böyüyənlər başqasının uğurunu öz məğlubiyyəti kimi görür.

Bəzən paxıllıq hissi ədalətsizlikdən doğulur. İnsan çalışmadığı, risk etmədiyi halda başqasının nəticə əldə etməsinə dözə bilmir. Özünü sevən insan başqasının uğuruna sevinə bilir. Özünü sevməyən isə paxıllıq edir", - deyə ekspert bildirib.

"Məndən üstün olar", "yerimi tutar", "sevilmərəm" qorxusu paxıllığı qidalandırır. Əbdül Səlimli deyir ki, bu hiss bəzi məqamlarda özünü daha da qabarıq göstərir:

"Paxıllıq hissi xüsusən status, pul, münasibət, diqqət kimi mövzularda daha çox ortaya çıxır. Paxıllıq edən insan əslində qarşısındakına yox, özünə qəzəblidir. Bu hiss müalicə olunmazsa kinə, dedi-qoduya, zərər vermə istəyinə çevrilə bilər. Bir birimizə daha səmimi və səbirli davranmaq vacibdir".

Ziya SƏCCAD