"Bakıda və Abşeron yarımadasında çıxarışı olmayan daşınmaz əmlakların sənədləşdirilməsi istiqamətində ciddi yeniliklər gözlənilir".

Bunu BAKU.WS-ə açıqlamasında Azərbaycan Qiymətləndiricilər Cəmiyyətinin (AQC) sədri Vüqar Oruc bildirib.

Onun sözlərinə görə, hazırda paytaxt və yarımadada təxminən 500 mindən çox sənədsiz daşınmaz əmlak mövcuddur və bu obyektlərin mərhələli şəkildə çıxarışla təmin olunması planlaşdırılır:

"Eyni zamanda, ölkənin rayonlarında da yüz minlərlə daşınmaz əmlak köhnə sənədlərlə – əsasən sovet dövründən qalan ev kitabları ilə istifadə olunur və onların da mərhələli qaydada hüquqi sənədlərlə təmin edilməsi nəzərdə tutulur.

Artıq bu istiqamətdə müəyyən addımlar atılıb və ilkin mərhələdə qeyri-yaşayış obyektlərinin sənədləşdirilməsinə başlanılıb. Növbəti mərhələdə isə torpaq sahələri və fərdi yaşayış evlərinin sənədləşdirilməsi gündəmdədir. Təkliflərə əsasən, əmlak amnistiyası bütün əmlak növlərini və sənədsiz obyektləri əhatə etməlidir. Bu məqsədlə aidiyyəti qurumlarda xüsusi komissiyalar fəaliyyət göstərir və prosesin mərhələləri müəyyənləşdirilir".

AQC sədri əlavə edib ki, son qərarlara əsasən, vətəndaş müraciət etdikdən sonra 15 gün ərzində onun əmlakının sənədləşdirilməsinə hüquqi maneənin olub-olmaması ilə bağlı rəsmi cavab verilməlidir:

"Əvvəllər mövcud olan bürokratik əngəllərin aradan qaldırılması nəticəsində prosesin daha operativ həyata keçirilməsi mümkün olacaq. Ümumilikdə isə qanunsuz sayılmayan, yəni təhlükəli və qadağan olunmuş ərazilərdə yerləşməyən tikililərin sənədləşdirilməsi daha məqsədəuyğun hesab olunur".

Orxan Hüseyn