Son illərdə şəhər küçələrində səssizcə sürətlə yayılan bir nəqliyyat vasitəsi var – elektrik skuterləri. Rahatlığı və operativliyi ilə diqqət çəkən bu vasitələr artıq gündəlik həyatın bir hissəsinə çevrilsə də, onların yaratdığı təhlükələr getdikcə daha çox müzakirə olunur.

AVESTA.AZ-in məlumatına görə, piyadalar üçün gözlənilməz risk mənbəyinə çevrilən skuterlər yol hərəkətində yeni qaydalar və məsuliyyət məsələsini gündəmə gətirir.

DİN-in Mətbuat Xidmətinin əməkdaşı Lumu İsrəfilli AVESTA.AZ-ə bildirib ki, son dövrlərdə ölkəmizdə küçə və prospektlərdə kiçik elektrik nəqliyyat vasitələrindən, xüsusilə skuterlərdən istifadə edən sürücülərin sayında artım müşahidə olunur. Belə nəqliyyat vasitələri səssiz və sürətli hərəkətinə görə piyadalar üçün daha çox risk hesab edilir:

"Qanunvericiliyə əsasən, skuter tipli kiçik elektrik nəqliyyat vasitələrini idarə edən şəxslər tərəfindən yol hərəkəti qaydalarının pozulması məsuliyyət yaradır. Skuterlərin hərəkətinə park və həyət ərazilərində, yaşayış zonalarında, velosiped yollarında, habelə ümumi istifadədə olan avtomobil yollarında yol nişanları və ya yol nişanlanmasının tələblərinə riayət etməklə yolun sağ kənar zolağı ilə icazə verilir.

Bu növ nəqliyyat vasitələrini idarə edərkən yol nişanlarının və ya yolun hərəkət hissəsinin nişanlanması tələbləri pozulursa, yaxud piyadaların hərəkətinə maneə yaranırsa, həmin şəxslər barəsində qanunamüvafiq tədbirlər görülür.

Vətəndaşlara çağırış edərək bildiririk ki, belə kiçik nəqliyyat vasitələrini piyada səkilərində sürməkdən çəkinməli, həmçinin qoruyucu dəbilqə və digər təhlükəsizlik vasitələrindən istifadəyə diqqətlə yanaşmalıdırlar".

Bakı Şəhər DYP İdarəsinin bölmə rəisi, polis mayoru Toğrul Nəsirli isə AVESTA.AZ-ə açıqlamasında deyib ki, mövcud qanunvericiliyin tələblərinə əsasən kiçik elektik nəqliyyat vasitələrinin ümumi istifadədə olan avtomobil yollarında yolun sağ kənar zolağından başqa, digər zolaqlarla, eyni zamanda velosiped yolu olduğu halda, onun yanındakı yolla hərəkət etməsi qadağandır:

"Belə hal aşkarlandığı təqdirdə sürücü barəsində AR İXM-nin 338-ci maddəsinə uyğun olaraq 40 manat məbləğində cərimə nəzərdə tutulub.

Bu tip nəqliyyat vasitələrini idarə edən şəxslərdən xahişimiz ondan ibarətdir ki, yol hərəkəti qaydaları ilə yanaşı, təhlükəsizlik qaydalarına da ciddi şəkildə riayət etsinlər".

Orxan Hüseyn