Zəngəzur dəhlizi yalnız Azərbaycanın əsas hissəsi ilə Naxçıvan arasında birbaşa quru əlaqəsini bərpa etməyəcək, eyni zamanda, Şərq-Qərb və Şimal-Cənub beynəlxalq nəqliyyat dəhlizlərini birləşdirən mühüm strateji bağlantıya çevriləcək.

AVESTA.AZ "Report"a istinadən xəbər verir ki, bunu Cəbrayıl, Qubadlı və Zəngilan rayonlarında Azərbaycan Prezidentinin xüsusi nümayəndəsi Vahid Hacıyev Bakıda Ümumdünya Şəhərsalma Forumunun 13-cü sessiyası (WUF13) çərçivəsində keçirilən "Urbisiddən dirçəlişə: Azərbaycanın azad olunmuş ərazilərində dayanıqlı yenidənqurma, yenidən məskunlaşma və inkişaf" adlı tədbirdə deyib.

Onun sözlərinə görə, Azərbaycan torpaqları işğaldan azad edildikdən sonra bu dəhlizin reallaşdırılması istiqamətində genişmiqyaslı işlərə başlanılıb:

"Hazırda dəhlizin avtomobil yolu hissəsinin tikinti mərhələsi yekunlaşır. Eyni zamanda, dəmir yolu xətti də tamamlanmaq üzrədir. Bundan əlavə, Araz çayı üzərində Azərbaycanla İranı birləşdirəcək körpünün tikintisi də başa çatmaqdadır. Beləliklə, bu layihə regional nəqliyyat və logistika inteqrasiyasının mühüm elementinə çevrilir".

Xüsusi nümayəndə bildirib ki, Zəngəzur dəhlizinin həyata keçirilməsi regionda dairəvi dəmir yolu şəbəkəsinin formalaşmasına imkan verəcək və Azərbaycanın illik yükdaşıma potensialını təxminən 50 milyon ton artıracaq:

"Bununla yanaşı, Zəngilan Beynəlxalq Hava Limanı da təyyarələri qəbul edir, Bu da yükdaşımalarının çevikliyini, əlaqəliliyi, eləcə də investorlar və biznes üçün əlçatanlığı əhəmiyyətli dərəcədə yaxşılaşdıracaq. Artıq dəhliz tamamlanmadığı halda belə logistika və sənaye şirkətlərinin böyük marağını müşahidə edirik. Hesab edirik ki, investorlar bu marşrutun strateji əhəmiyyətini və yaradacağı iqtisadi imkanları anlayırlar".