İran nüvə silahı axtarışında deyil.

AVESTA.AZ report-a istinadən xəbər verir ki, bunu İran Prezidenti Məsud Pezeşkian deyib.

"Biz nüvə silahı axtarmırıq, regiondakı gərginliyin səbəbi İsraildir", - o bildirib.

İran Prezidentinin sözlərinə görə, ölkəsi alçaldılma ilə aparılan diplomatiyaya qarşıdır: "İnsanların 80 gündən artıq meydanda qalması dünyanı heyrətləndirir. Halbuki iki bomba və raketin köməyi ilə bir qrup xainin ölkəni xaosa sürükləyəcəyini düşünürdülər".

M. Pezeşkian bildirib ki, İran dünyanın ən güclü dövlətinə müqavimət göstərib. "Belə olan halda çətinlikləri qəbul etməliyik, müharibə aparıb hər şeyin adi qaydada davam etməsini gözləmək olmaz", - o xalqa müraciət edib.

Xatırladaq ki, fevralın 28-də ABŞ və İsrail İrana qarşı hərbi əməliyyatlara başlayıb və bir sıra şəhərlərə hava zərbələri endirilib. Həmin gün zərbələr nəticəsində İranın Ali rəhbəri Əli Xamenei öldürülüb. İran buna cavab olaraq İsrail ərazisinə və Fars körfəzi ölkələrindəki ABŞ hərbi bazalarına hücum edib.

İran, ABŞ və onların müttəfiqləri aprelin 8-ə keçən gecə atəşkəs razılaşmasına nail olublar. Tramp sonradan atəşkəsi qeyri-müəyyən müddətə uzadıb.

Tərəflər münaqişəni həll etmək üçün Pakistanda danışıqlar aparıblar, lakin 11-12 apreldə keçirilən ilk raund heç bir nəticə verməyib.

ABŞ Tehrana təzyiq göstərmək üçün İran limanlarını və Hörmüz boğazından keçidi blokadaya alıb. İran da öz növbəsində Fars körfəzinə gedən gəmilər üçün Hörmüz boğazının bağlandığını elan edib. Regionda dinamik şəkildə dəyişən vəziyyət qlobal enerji böhranına səbəb olub.