Azərbaycan və Birləşmiş Ərəb Əmirlikləri (BƏƏ) səylərini birləşdirərək regionda sülhün və sabitliyin möhkəmləndirilməsinə töhfə verən həmfikir ölkələr və strateji tərəfdaşdır.

BAKU.WS report-a istinadən xəbər verir ki, bunu Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev Dubayda Ərəb Media Forumunda çıxışı zamanı bildirib.

Onun sözlərinə görə, Azərbaycan özünün çoxşaxəli geosiyasi kimliyini inkişaf etdirməkdə davam edir.

"Kimliklərimizdən biri Cənubi Qafqaz, digəri isə Yaxın Şərqlə bağlıdır, çünki Azərbaycan daha geniş islam sivilizasiyasının bir hissəsidir. Biz daha geniş Yaxın Şərq regionunda BƏƏ ilə Azərbaycan arasında ola bilsin müəyyən coğrafi məsafənin mövcud olduğunu görürük", - o qeyd edib.

Bununla yanaşı, H.Hacıyev vurğulayıb ki, Azərbaycan və BƏƏ həmfikir ölkələr və strateji tərəfdaşdır:

"Biz bir səslə çıxış edirik və hesab edirik ki, ölkələrimiz birgə səylərini birləşdirərək regionumuzda sülh və təhlükəsizliyin təmin olunmasına töhfə verir".