Fransada yaşayış xərclərinin artmasına qarşı keçirilən etirazların yeni mərhələsinin oktyabrın 24-də baş tutacağı gözlənilir.

BAKU.WS xarici mətbuata istinadən xəbər verir ki, ötən şənbə günü bir sıra şəhərlərdə qarşıdurma və iğtişaşlarla müşayiət olunan aksiyaların təşkilatçılarından olan "Sarı jiletlilər" hərəkatının koordinasiya qrupu yeni etiraz aksiyalarının keçiriləcəyini elan edib.

Məlumata görə, təşkilatçılar bazar ertəsi səhər saatlarında "İkinci akt" adlandırdıqları yeni etiraz mərhələsi barədə açıqlama veriblər. Hərəkatın koordinasiya qrupu planlaşdırılan aksiyaların xəritəsini dərc edib. Aksiyaların oktyabrın 24-də keçirilməsi nəzərdə tutulur.

Məlumata görə, Fransanın Prezidenti Emmanuel Makron bundan əvvəl hökumətdən etirazların təkrarlanmaması üçün tədbirlər görməyi tələb edib. O, iğtişaşlara görə məsuliyyət daşıyan şəxslərin cəzalandırılacağını və zərər çəkmiş sahibkarlara dəstək göstəriləcəyini vəd edib.

Makronun çıxışı isə siyasi rəqibləri tərəfindən tənqid olunub. Onlar ölkədəki sosial narazılığa görə məsuliyyəti prezidentin üzərinə qoyublar.