Azərbaycanın günəşli və küləkli iqlimə malik olması "yaşıl enerji" zonalarının yaradılmasına imkan yaradır.

Bunu “Report”a “Yaşıl Dünya” Ekoloji Maarifləndirmə İctimai Birliyinin sədri Elman Cəfərli Birləşmiş Ərəb Əmirliklərində keçiriləcək İqlim Dəyişmələri üzrə Çərçivə Konvensiyasının Tərəflər Konfransının 28-ci sessiyasında (COP 28) Azərbaycanın iştirakını şərh edərkən deyib.

Onun sözlərinə görə, Azərbaycan Naxçıvan, Qarabağ və Şərqi Zəngəzur regionlarında "yaşıl enerji" zonalarının yaradılmasını hədəfləyib.

“Azərbaycanın bərpaolunan enerji potensialı - quruda külək və günəş enerjisinin həcmi 27 qiqavatdan çoxdur, Xəzər dənizinin Azərbaycan sektorunda isə külək enerjisi potensialı 157 qiqavat təşkil edir. Prezident İlham Əliyev 2021-ci il mayın 18-də Ağdamda ictimaiyyət nümayəndələri ilə görüşdə bəyan etdi ki, bütün Qarabağ zonası "yaşıl enerji" zonası olacaq”.

E.Cəfərli qeyd edib ki, Azərbaycan 1995-ci ildə BMT-nin İqlim Dəyişmələri üzrə Çərçivə Konvensiyasını ratifikasiya etdikdən sonra qlobal iqlim dəyişmələrinin mənfi təsirlərinin yumşaldılması üzrə beynəlxalq səylərə qoşulub:

“Dövlətimiz Paris Sazişini 2016-cı ildə ratifikasiya edərək qlobal iqlim dəyişmələrinin təsirlərinin yumşaldılması üzrə təşəbbüslərə özünün töhfəsi olaraq baza 1990-cu illə müqayisədə 2030-cu ilədək istilik effekti yaradan qazların emissiyalarının səviyyəsində 35 % azalmanı hədəf kimi götürüb. Elektrik enerjisi istehsalında bərpa olunan enerji mənbələrinin payının 2026-cı ilədək 24 %, 2030-cu ilədək isə 30 %-ə çatdırılması “Azərbaycan Respublikasının 2022-2026-cı illər üçün sosial-iqtisadi inkişaf strategiyası”nda nəzərdə tutulub”.

O vurğulayıb ki, bərpa olunan və "yaşıl enerji" əsasında istehsal olunan elektrik enerjisi ixracı Azərbaycanın enerji strategiyasında yeni eranın başlanğıcıdır:

“Ölkəmizdə energetika sahəsində bərpa olunan enerji mənbələrindən istifadənin genişləndirilməsi prioritet vəzifə olaraq irəli sürülüb və 2030-cu ilədək elektrik enerjisinin qoyuluş gücündə bərpa olunan enerjinin payının 30 %-ə çatdırılması hədəf kimi müəyyənləşdirilib. Azərbaycan neft və qaz ehtiyatları ilə zəngin olmasına baxmayaraq, bərpa olunan enerji sektorunun inkişafına xüsusi diqqət yetirir, yaxın gələcəkdə "yaşıl" və hidrogen enerjisinin ixracatçısına çevriləcək”.

E.Cəfərli vurğulayıb ki, dünyanın aparıcı "yaşıl enerji" şirkətləri olan xarici investorlarla imzalanan sazişlərə və anlaşma memorandumlara əsasən, qarşıdakı illərdə Azərbaycanda istehsal ediləcək bərpa olunan enerjinin həcmi 10 qiqavata çatacaq. Bu ilin oktyabr ayında Azərbaycanda Birləşmiş Ərəb Əmirliklərinin “Masdar” şirkəti tərəfindən inşa edilmiş 230 meqavat gücündə Qaradağ Günəş Elektrik Stansiyasının açılışı olub. Bu, Xəzər dənizi və Qafqaz regionunda ən böyük günəş elektrik stansiyasıdır. Azad olunmuş Qarabağda və Şərqi Zəngəzurda 2021-2023-cü illər ərzində 170 meqavat gücündə hidroelektrik stansiyalar istifadəyə verilib. 2024-cü ilin sonuna qədər bu rəqəm 270 meqavata çatacaq. O hesab edir ki, bir neçə ildən sonra erməni işğalından azad edilmiş ərazilərdə hidroelektrik stansiyaların ümumi gücü 500 meqavat təşkil edəcək.

“Azərbaycan, həmçinin Xəzər-Avropa İttifaqı enerji dəhlizini yaratmaq üçün tərəfdaşları ilə fəal işləyir. 2020-ci il yanvarın 9-da Energetika Nazirliyi ilə "ACWA Power" (Səudiyyə Ərəbistanı Krallığı) və "Masdar" şirkətləri arasında bərpa olunan enerji üzrə pilot layihələrin həyata keçirilməsi ilə bağlı İcra müqavilələri imzalanıb. Müqavilələrə uyğun olaraq "ACWA Power" şirkəti ilə 240 MVt gücündə külək, "Masdar" şirkəti ilə isə 200 MVt gücündə günəş stansiyalarının tikintisi ilə bağlı pilot layihələr icra ediləcək", - deyə ekspert qeyd edib.

Noyabrın 30-da Dubayda keçiriləcək beynəlxalq tədbirin əhmiyyətindən danışarkən, E.Cəfərli bildirib ki, tədbirə 100-dən çox dövlət və hökumət başçısı, həmçinin 100 minə yaxın nümayəndəni qatılacaq. COP28 tədbiri Ermənistanın işğal zamanı ərazilərimizdə həyata keçirdiyi ekoterror barədə məlumatların geniş auditoriyaya çatdırılması baxımdan da olduqca vacibdir”.