"Google" və "Meta" şirkətləri son illərdə Rusiya hökumətinin qeyri-qanuni hesab etdiyi məzmunu silmədiklərinə görə, bir neçə milyon dollarlıq cərimə təhlükəsi ilə üzləşiblər. Məhkəmə sənədlərinə yaxından nəzər saldıqda məlum olur ki, bunlar çox vaxt həbsdə olan müxalifət lideri Aleksey Navalnıya dəstək nümayişləri ilə bağlı yazılardır.

 

Rusiya hökuməti sosial şəbəkələrdə hansı məzmunlu materiallara qarşı çıxıb?

Avesta.az xəbər verir ki, 2018-ci ilin yayında "Sibir Vikinqi" təxəllüsü ilə yazan rus şairi “Facebook” hesabında karikatura yerləşdirib. Şəkildə Rusiya gerbi ikibaşlı qartal formasında təsvir edilib, quşların başları prezident Vladimir Putin və o vaxtkı baş nazir Dmitri Medvedevin üzləri ilə əvəz olunub. Onun yanında qartalın digərlərindən iki dəfə tamahkar olduğunu, iki dəfə çox yalan danışdığını və dörd gözü ilə müşahidə apardığını iddia edən kiçik bir şeir yerləşdirilib. 

 

Karikatura belə sualla bitir: “Ruslar bu yoluxmanı aradan qaldırmaq üçün nə vaxt oyanacaqlar?”.

 

 

Rusiya hökuməti “Facebook”a “dövlətə, konstitusiyaya və Rusiya Federasiyasının prezidentinə açıq-aşkar hörmətsizlik” səbəbindən bu postu silməyi tələb edib. Lakin “Facebook” buna əməl etməyib.

 

Qeyd edək ki, Rusiyada Qərb sosial mediasına qarşı açılan 60-dan çox məhkəmə iddiası var. Yazılardan biri 2 milyon dollardan çox cərimə ilə nəticələnib. Cərimələrin nə qədərinin ödənildiyi hələlik bəlli deyil.

 

Qərb sosial mediaya qarşı hücumları senzura kimi qiymətləndirir. Kreml isə Rusiyada siyasi senzura olduğunu söyləməkdən imtina edir. Prezident Putinin mətbuat katibi əvvəllər bildirmişdi ki, sosial media şirkətlərinə qarşı görülən tədbirlər senzura deyil, sadəcə olaraq Rusiya qanunlarını tətbiq etməyə cəhddir.

 

 

Sosial media şirkətlərinə təzyiq 2015-ci ildən - Rusiya istifadəçilərinin şəxsi məlumatlarını Rusiya ərazisində saxlamağa məcbur edən və hökumətə bunu etmədiklərinə görə, onları cərimələmək və ya bağlamaq səlahiyyəti verən qanunun qüvvəyə mindiyi vaxtdan başlayıb. Qərb şirkətlərinin heç biri bu tələbi yerinə yetirməyib. Məhz 2016-cı ildə Rusiya hökumətindən "Google" və "YouTube"dan videoların silinməsi, müəyyən axtarış nəticələrinin bloklanması tələbləri sürətlə artmağa başlayıb. 

 

Şirkətin hesabatları göstərir ki, son 10 il ərzində Rusiyadan dünyanın digər ölkələrinin ümumi sayından daha çox müraciətlər daxil olub.