Beynəlxalq konfransda ekspertlər regenerativ kənd təsərrüfatının maliyyələşdirilməsinin artırılmasının zəruriliyini müzakirə ediblər, aqrar sektorunun dayanıqlı gələcəyinin yalnız kiçik fermerlərin dəstəklənməsi ilə mümkün olduğunu vurğulayıblar.

“AVESTA.AZ” xəbər verir ki, bu barədə “Qlobal yaşıl ətraf mühit şəbəkəsi” (GLOGEN) qeyri-hökumət təşkilatının (QHT) nümayəndələri bildiriblər.

İnnovasiya platformaları və uğurlu layihələr nümunəsi göstərir ki, şəffaflıq, birgə idarəetmə və investisiya qlobal dəyişikliklər üçün əsas ola bilər.

Müzakirələr zamanı çıxış edənlər vurğulayıblar ki, dünya ərzaq məhsullarının təqribən 80 %-ni istehsal edən kiçik fermerlər, kənd təsərrüfatı sahəsinə külli miqdarda vəsait ayrılmasına baxmayaraq, kifayət qədər maliyyə dəstəyi almırlar. Bu, etibarlı infrastrukturun, torpaq hüquqlarının və şəffaf məlumatların olmaması ilə bağlıdır ki, bu da investorlar üçün ciddi maneələr yaradır.

“Green Earth Agro”nun baş direktoru Raşank Badoliya innovativ həll yolu təklif edib: investorlara torpaq hüquqları ilə bağlı problemlərdən yan keçməklə birbaşa investisiya etməyə imkan verən platforma vasitəsilə kiçik fermerlərin birləşdirilməsi. Badoliya vurğulayıb ki, regenerativ fermerlik təkcə məhsul məhsuldarlığını artırmağa yox, həm də torpağın münbitliyinin bərpasına və karbon emissiyalarını azaltmağa kömək edir.

“Biz kiçik fermerlərdən torpaq icarəyə götürürük və qazancı onlarla bölüşürük, onların dolanışığını yaxşılaşdırmağa kömək edirik. Məqsədimiz yerli icmaların dayanıqlı kənd təsərrüfatı təcrübələrindən faydalandığı genişmiqyaslı əkinçilik modeli yaratmaqdır”, - o söyləyib.

Uğurlu nümunə kimi Hindistanda yerli özünəyardım qruplarının kimyəvi maddələrdən və gübrələrdən istifadə etmədən regenerativ kənd təsərrüfatı prinsiplərini fəal şəkildə həyata keçirərək məhsuldarlığı və mənfəəti artırdığı “Andhra Pradesh Community Managed Natural Farming” layihəsi göstərilib. Həmçinin Misirdə orqanik və regenerativ məhsul istehsalı vasitəsilə kiçik fermerləri yoxsulluqdan çıxarmağa kömək edən SEKEM layihəsi də xatırladılıb.

“Aqro-qida sistemində qlobal dəyişiklik üçün bu cür platformalar əvəzsizdir. Dayanıqlı gələcək üçün şərait yaratmaq məqsədilə kənd təsərrüfatını hər kəs üçün gəlirli etməliyik”, - Badoliya fikrini tamamlayıb.