Bu il Novruz Bayramı Ramazan ayına təsadüf etdiyindən, insanlar həm bayram süfrəsi açacaq, həm də iftar edəcəklər. Uzun saatlar ac və susuz qalan orqanizmin sağlam qalması və bayramın da dadını çıxarmaq üçün qidalanmaya xüsusi diqqət yetirmək vacibdir.

AVESTA.AZ xəbər verir ki, iftar zamanı birdən-birə ağır və yağlı yeməklər yemək mədə-bağırsaq problemlərinə səbəb ola bilər.

Sağlam iftar üçün bu qaydalara əməl etmək tövsiyə olunur:

Xurma və su ilə başlayın – Xurma qanda şəkərin səviyyəsini balanslaşdırır və həzmi asanlaşdırır. Su isə orqanizmin maye ehtiyacını qarşılayır.

İlıq şorba və ya kompot – Mədəyə birdən yük düşməməsi üçün ilk olaraq yüngül şorbalar (məsələn, mərci və ya tərəvəz şorbası) və ya təbii meyvə kompotu içmək faydalıdır.

Tərəvəz və protein tərkibli yeməklər – Toyuq, balıq və ya qırmızı ət, eyni zamanda göyərti və tərəvəzlərdən ibarət yeməklər iftar süfrəsində olmalıdır.

Şirin desertlərə nəzarət edin – Şəkərli və ağır şirniyyatları iftardan dərhal sonra yemək tövsiyə olunmur. Paxlava və şəkərbura kimi Novruz şirniyyatlarını bir qədər gec və az miqdarda qəbul etmək daha faydalıdır.

Bu qaydalara əməl edərək həm orucu sağlam şəkildə aça, həm də Novruz süfrəsinin ləzzətini çıxara bilərsiniz. Bayramınız mübarək!