Araşdırmalar göstərir ki, yuxu davamlı çəki itkisində mühüm rol oynayır.

AVESTA.AZ xəbər verir ki, bu barədə Çikaqo Universitetinin Tibb fakültəsinin və Çikaqo Yuxu Mərkəzinin mütəxəssisi Esra Tasali ətraflı məlumat verib.

Yuxu sahəsində mütəxəssis olan Esra Tasalinin sözlərinə görə, kifayət qədər yatmayan insanlarda aclıq hissi artır. Bunun iki əsas səbəbi var:

1. "Mükafat" mərkəzlərinin aktivliyi artır: Yuxusuzluq zamanı beynin mükafat mərkəzləri daha aktiv olur. Nəticədə, insan yüksək kalorili və zərərli qidalara daha çox meyl edir. Eyni zamanda bu istəyi cilovlamaq qabiliyyəti də zəifləyir.

2. Aclıq hormonlarının artması: Yuxusuzluq iştaha hormonlarının səviyyəsini artırır. Bu hormonlardan ən məşhuru qrelin – yəni aclıq hormonudur. Az yuxu, qrelinin yüksəlməsinə və dolayı yolla da daha çox yeməyə səbəb olur. Uzun müddət bu vəziyyət çəki artımına gətirib çıxarır.

Arıqlamaq istəyənlər üçün gündə azı 7 saat yatmaq tövsiyə olunur. Hətta əlavə 30 dəqiqəlik yuxu belə gündəlik qəbul olunan kalori miqdarını azalda bilər.

Yuxunun keyfiyyətini müəyyən edən əsas mərhələ isə "yavaş yuxu" (digər adıyla dərin yuxu) mərhələsidir. Bu mərhələ yaddaşın möhkəmlənməsi, hüceyrələrin bərpası, toxumaların yenilənməsi və metabolik tullantıların təmizlənməsi üçün olduqca vacibdir. Dərin yuxu eyni zamanda maddələr mübadiləsinə və hormonların ifrazına təsir göstərir. Məsələn, məhz bu mərhələdə böyümə hormonu istehsal olunur.