İçərişəhərdə yerləşən restoranlardan birində oğurluq edən yeniyetmə dostlara məhkəmə hökmü elan olunub.

BAKU.WS "Qaynarinfo"ya istinadən xəbər verir ki, 2006-cı il təvəllüdlü Ariz Mərdənov (soyadı şərti), 2008-ci il təvəllüdlü Nahid Vəliyev (soyadı şərti) və 2010-cu il təvəllüdlü Babək Fətəliyev (soyadı şərti) barəsində Cinayət Məcəlləsinin 177.2.1 (bir qrup şəxs tərəfindən törədilən oğurluq) və 177.2.3-cü (qəsdən zərər vurmaqla törədilən oğurluq) maddələri ilə açılmış cinayət işinə məhkəmədə baxılıb.

İstintaqla müəyyən olunub ki, sosial şəbəkə vasitəsilə əvvəlcədən razılaşan yeniyetmələr Səbail rayonu, Böyük Qala küçəsi, 41 ünvanında yerləşən restorana daxil olaraq oğurluq ediblər. Onlar ümumi dəyəri 6 manat olan 2 ədəd energetik içki, 65 manatlıq viski və kassa aparatından 4 000 manat nağd pul aparıblar. Oğurlanmış içkiləri istifadə edib, pulları isə aralarında bölüblər.

Məhkəmənin qərarına əsasən, Ariz Mərdənov 2 il 6 ay, Nahid Vəliyev və Babək Fətəliyev isə hər biri 3 il müddətinə azadlığın məhdudlaşdırılması cəzasına məhkum ediliblər. Cəza müddətində onların elektron qolbaq taxaraq nəzarətdə saxlanılması və bir-birilərinə 100 metr yaxınlaşmamaq tələbləri müəyyən olunub.