Gəncədə azyaşlıya qarşı seksual zorakılıq edən şəxs barəsində məhkəmə qərar çıxarıb.

BAKU.WS-in məlumatına görə, hadisələr 2024-cü ilin avqust və sentyabr aylarında Gəncə şəhərinin Ət Kombinatı və Gülüstan qəsəbələrində baş verib.

Təqsirləndirilən şəxs, 2012-ci il təvəllüdlü azyaşlıya qarşı zor tətbiq etməklə və onun köməksiz vəziyyətindən istifadə etməklə bir neçə dəfə seksual xarakterli hərəkətlər törədib. Zərərçəkmiş, məhkəmədə verdiyi ifadədə təqsirləndiriləni ailə üzvləri ilə hədələməkdə və zorakılıq etməkdə ittiham edib, ağır cəza tələb edib.

Zərərçəkmişin qanuni nümayəndəsi də məhkəmədə bildirib ki, hadisə məktəb rəhbərliyinin xəbərdarlığı ilə üzə çıxıb. O, təqsirləndirilənin uşağı təqib etdiyini və zorakılıq etdiyini vurğulayıb. Məhkəmədə təqsirləndirilən şəxs ittihamı qəbul etməyib və hadisəni inkar edib, lakin məhkəmə onun ifadəsini sübutlarla təkzib edərək qəbul etməyib.

Sübutlar arasında məhkəmə-tibbi ekspertizaların rəyləri, psixoloji və psixiatrik ekspertizalar, hadisə yerinə baxış protokolları, mobil telefon vasitəsilə çəkilmiş video qeydlər və digər sənədlər yer alıb. Ekspertizalar zərərçəkmişin bədənində qeyri-təbii cinsi əlaqə əlamətlərini təsdiqləyib. Təqsirləndirilən şəxsin telefonunda aşkar edilən video qeyd sentyabrın 24-də çəkilib və hadisəni sübut edib.

Gəncə Ağır Cinayətlər Məhkəməsi 1967-ci il təvəllüdlü şəxs barəsində hökm çıxarıb. Məhkəmə, təqsirləndirilən şəxsi Azərbaycan Respublikası Cinayət Məcəlləsinin 150.3.3-cü maddəsi (on dörd yaşına çatmayan şəxsə qarşı təkrarən seksual xarakterli zorakılıq hərəkətləri) ilə təqsirli bilib və onu 17 il 6 ay müddətinə azadlıqdan məhrum etmə cəzasına məhkum edib.

Məhkəmə cəza təyin edərkən cinayətin ictimai təhlükəliliyini, zərərçəkmişin azyaşlı olmasını və təqsirləndirilənin etibardan sui-istifadə etməsini nəzərə alıb. Eyni zamanda, şəxsin əvvəllər məhkum olunmamasını və yaşayış yerində müsbət xarakterizə olunmasını cəzanı yüngülləşdirən hal kimi qiymətləndirib.