Bakıda cəzaçəkmə müəssisəsindən yeni çıxmış məhkum kafeyə basqın edib.

AVESTA.AZ Oxu.Az-a istinadən xəbər verir ki, Gədəbəy rayon sakini Niyaməddin Əliyev 2019-cu ildə törətdiyi cinayətə görə azadlıqdan məhrum edilib. O, cəzasını çəkdikdən sonra Gədəbəy rayonuna qayıdaraq, Şəmkir-Zəyəm yolunda fəaliyyət göstərən kafedə ofisiant-kababçı işləməyə başlayıb. Bir müddət həmin kafedə işləyən Niyaməddin sonradan içki aludəçisinə çevrilib.

Kafenin sahibi Mirzə Ağayev onunla bu barədə dəfələrlə söhbət aparsa da, Niyaməddin iş yerində spirtli içki qəbul etməyə son qoymayıb. Bir gün Mirzə Ağayev onun yenidən spirtli içki qəbul etdiyini görüb və ona "Əgər araq içəcəksənsə, bir də kafeyə gəlmə" deyib. Kafe sahibinin bu iradını özünə təhqir hesab edən Niyaməddin əsəbiləşərək Mirzə Ağayevə hücum edib. O, sahibkarı yumruq və təpik zərbələri ilə döyüb, kafenin 3 qapı, iki pəncərəsini qıraraq hadisə yerindən qaçıb. Niyaməddin kafedən çıxıb Bakıya, Sabunçu rayonuna gəlib və məsuliyyətdən yayınmağa cəhd edib.

Bir neçə gün Bakıda gizlənən Niyaməddin məsuliyyətdən yayındığını zənn edib və Bakıxanov qəsəbəsindəki kafedə yenidən spirtli içki qəbul edib. O, sərxoş halda kafedən çıxarkən ofisiant işləyən İntiqam adlı şəxslə rastlaşıb və gözü onun əlindəki mobil telefona sataşıb. Niyaməddin həmin telefonu ondan alıb satmaq qərarı verib və bu məqsədlə o İntiqama yaxınlaşaraq, "mənə bir pivə al, içim" deyib. İntiqam ona pivə almaqdan imtina edib və nəticədə Niyaməddin qəflətən İntiqamın sifət nahiyəsinə yumruqla zərbə endirib. İntiqamın yerə yıxıldığını görən Niyaməddin onun əlindəki telefonu alaraq hadisə yerindən qaçıb.

Polis əməkdaşlarının keçirdikləri əməliyyat nəticəsində Niyaməddin Sabunçu rayonu ərazisində saxlanılaraq istintaqa təhvil verilib.

Faktla bağlı cinayət işi Bakı Ağır Cinayətlər Məhkəməsinə göndərilib. Məhkəmənin hökmü ilə N.Əliyev 6 il azadlıqdan məhrum edilib.