"Dövlət qurumları bu sahədə tənzimləmə apara bilməz. Bu, bazar iqtisadiyyatı qanunlarıdır və bizim tənzimləmə aprmaq niyyətimiz də yoxdur. Amma biz digər mexanizmlərlə qiymətlərin aşağı düşməsi üçün müəyyən addımlar atırıq".

Bu sözləri AVESTA.AZ-in müxbirinə Dövlət Turizm Agentliyinin (DTA) İdarə Heyəti sədrinin müşaviri Kənan Quluzadə mediatur çərçivəsində bildirib.

O əlavə edib ki, əsas siyasət təklifin həcmi və rəqabətin artırılmasıdır ki, qiymətlər daha əlçatan olsun:

"Qiymətlərin ümumən yüksək, orta və ya aşağı olması nisbi bir məsələdir. Çünki beş ulduzlu otelləri regional müqayisə etsək, Azərbaycanda qiymətlər ətrafımızdakı dövlətlərdən heç də baha deyil. Bunu həm dörd ulduzlu, həm də üç ulduzlu seqmentə ayırd etmək olar.

Amma bizim infrastrukturumuz daha yaxşıdır. Ölkəmizdə daha geniş çeşidli xidmətlər var ki, bəzi xərclər tələb edir. Lakin kənd evləri və aşağı büdcəli otelləri seçərək hər kəs öz büdcəsinə uyğun istirahət edə bilir. Bizim müşahidələrimiz göstərir ki, mövsüm vaxtı, uzun müddətli tətillər və istirahət günlərində otellərdə doluluq səviyyəsi çox yüksək olur. Tələbat var ki, otellər də formalaşır.

Otellərin ümumi qiymətin formalaşdırılması satışdan asılıdır. Otellər 50 faiz satış edirsə, qiymətlər nisbətən aşağı olur. Satış 70-90 faizə qalxırsa, qiymətlər bahalaşır. Eyni zamanda bayram günləri və mövsümün pik dövründə qiymətlər yuxarı olur. Bunlar hamısı özəl şirkətlərdir və onlara qiymətlətlə bağlı diktə etmək mümkün deyil. Biz çağırışlar edirik və vergi güzəştləri təqdim edirik. Bu güzəştlər vasitəsilə yeni otellərin tikilməsi və rəqabətin yaranması təmin olunur.

Hazırda elə regionlar var ki, faktiki olaraq orada bir otel fəaliyyət göstərir. O da öz qiymətlərini diktə edir. Onun ətrafında bir neçə yeni otel qurularsa, qiymətlər düşəcək. Elə regionlarımız var ki, orada otellər çoxdur və istənilən qiymətə xidmətlərdən istifadə etmək mümkündür".

Orxan Hüseyn