Feyxoa mürəbbəsi insan orqanizminə həm müsbət, həm də mənfi təsir göstərə bilər – bu, insanın fərdi xüsusiyyətlərindən asılıdır.

BAKU.WS xəbər verir ki, bu barədə rusiyalı həkim-qastroenteroloq Yevgeni Belousov xəbərdarlıq edib.

Onun sözlərinə görə, əgər bu ənənəvi desert düzgün hazırlanarsa və orta miqdarda qəbul edilərsə, faydalı ola bilər. Lakin bəzi insanlar üçün ehtiyatlı olmaq vacibdir.

"Feyxoa mürəbbəsindən şəkərli diabet xəstələrinə uzaq durmaq lazımdır, çünki tərkibində çox miqdarda şəkər var. Hətta şəkərin əvəzinə şirinləşdirici maddələrdən istifadə olunsa belə, feyxoanın tərkibindəki fruktoza qanda şəkərin səviyyəsini yüksəldə bilər. Bundan başqa, asan mənimsənilən karbohidratların artıq miqdarı bədəndə yağ toplanmasına səbəb olur. Yod tərkibli olduğuna görə feyxoa hipertiroidizmdən əziyyət çəkənlərə əks göstərişdir. Həmçinin allergik reaksiyaları da nəzərə almaq lazımdır. Mədə xorasından və ya turşuluğu yüksək olan qastritdən əziyyət çəkənlərdə xəstəliyin kəskinləşməsi zamanı bu mürəbbə qıcıqlandırıcı təsir göstərə bilər – çünki tərkibindəki turşular və lif mədə selikli qişasını zədələyə bilər," – deyə həkim izah edib.

Mütəxəssis miqdarına diqqət yetirməyi tövsiyə edir: böyüklərə gündə 1–2 çay qaşığından çox yeməmək, 3 yaşdan yuxarı uşaqlara isə həftədə 2–3 dəfədən artıq olmamaq şərtilə təxminən 1,5 çay qaşığı qəbul etmək məsləhətdir.

"Həm də faydası var. Mürəbbədə saxlanılan lif və pektin bağırsaq fəaliyyətini yumşaq şəkildə stimullaşdırır, toksinlərin orqanizmdən çıxmasına kömək edir. Bişirildikdən sonra belə, antioksidant təsir göstərən flavonoidlər qalır – onlar orqanizmdə oksidləşmə stresini və iltihabı azaldır. Feyxoa mürəbbəsi həm də yod mənbəyidir (təzə meyvəyə nisbətən az olsa da), bu da yod çatışmazlığı olan bölgələr üçün xüsusilə vacibdir. Qalan C vitamini və fitonutrientlər isə immun sistemini dəstəkləyir. Əgər şəkərin miqdarı məntiqli səviyyədə saxlanarsa, feyxoa mürəbbəsi sənaye istehsalı desertlərə nisbətən daha faydalı alternativ sayılır," – deyə həkim əlavə edib.