Paris təmsilçisi və Gürcüstan millisinin yarımmüdafiəçisi Xviça Kvaratsxeliya cari mövsümün yekunlarına görə "Qızıl top" mükafatına əsas namizədlərdən biri sayılır və ilk beşliyə daxil edilib.

AVESTA.AZ xəbər verir ki, futbolçunun bu nüfuzlu fərdi mükafatı qazanma ehtimalı üçün əmsal 11,00 olaraq qiymətləndirilir.

Bukmekerlər əsas favorit kimi Harri Keyni görürlər. O, "Bavariya" klubunda çıxış edir və əmsalı 3,25-dir.

İlk üçlükdə həmçinin "Bavariya"nın vingeri Olise və "Arsenal"ın yarımmüdafiəçisi Deklan Rays da yer alır (hər ikisi üçün 5,00 əmsal verilir).

Dördüncü pillədə isə hazırkı "Qızıl top" sahibi, yenə də PSJ-nin futbolçusu Usman Dembele qərarlaşıb.

Xatırladaq ki, aprelin 28-də UEFA Çempionlar Liqasının yarımfinal mərhələsinin ilk oyununda PSJ öz meydanında "Bavariya"ya 5:4 hesabı ilə qalib gəlib. Həmin görüşdə Kvaratsxeliya dubla imza atıb.