Omeqa-3 faydalı hesab olunsa da, həkimlər onun nəzarətsiz qəbulunun bəzi insanlarda problem yarada biləcəyi barədə xəbərdarlıq edirlər.

BAKU.WS xarici KİV-ə istinadən xəbər verir ki, mütəxəssislərin sözlərinə görə, xüsusilə keyfiyyətsiz balıq yağı tərkibli əlavələr yaşlı insanlarda damar sisteminə və beynin qan dövranına mənfi təsir göstərə bilər. Bu isə yaddaş və düşünmə qabiliyyətində zəifləmə riskini artıra bilər.

Rusiyalı həkim Darya Rusakova bildirib ki, omeqa-3 əlavələrinin təhlükəsizliyi əsasən xammalın keyfiyyəti və istehsal texnologiyasından asılıdır. Onun sözlərinə görə, keyfiyyətsiz əlavələr fayda vermək əvəzinə sağlamlığa zərər vura bilər.

Həkim qeyd edib ki, yaşlı insanlar çox vaxt xroniki xəstəliklərə görə müxtəlif dərmanlar qəbul edirlər. Omeqa-3-ün bəzi preparatlarla birlikdə istifadəsi də əlavə risk yarada bilər. Xüsusilə xolesterini azaldan dərmanlarla paralel qəbul zamanı nadir hallarda qısamüddətli idrak pozuntuları müşahidə oluna bilər.

Mütəxəssislər bildirirlər ki, omeqa-3 əlavələrinin həddindən artıq qəbulu qanın laxtalanmasını poza və qanaxma riskini artıra bilər. Bu təhlükə xüsusilə qan durulaşdırıcı dərman qəbul edən insanlarda daha yüksək olur.

Bununla yanaşı, həkimlər vurğulayırlar ki, təbii qida mənbələri - balıq, qoz və bu kimi qidalar təhlükəsiz sayılır. Balıq tərkibindəki mikroelementlər yaddaşı, düşünmə sürətini və stressə davamlılığı yaxşılaşdıra bilər.

Mütəxəssislər omeqa-3 əlavələrinin yalnız həkim nəzarəti ilə qəbul edilməsini tövsiyə edirlər.