2026-cı il futbol üzrə dünya çempionatında 1/4 final mərhələsi start götürür. Komandalar təkcə növbəti mərhələyə yüksəlmək üçün deyil, həm də əsas futbolçularını mümkün yarımfinal oyunu üçün qorumaq məqsədilə meydanda daha ehtiyatlı davranmalıdırlar.

AVESTA.AZ-in məlumatına görə, FİFA-nın turnir üçün tətbiq etdiyi yeni qaydalara əsasən, sarı vərəqələr iki dəfə silinir – qrup mərhələsindən sonra və 1/4 final başa çatdıqdan sonra.

Lakin pley-off mərhələsində ikinci sarı vərəqəsini alan futbolçu yarımfinal görüşünü buraxmalı olacaq.

Fransa

Fransa millisində Bredli Barkola, Manu Kone və Maykl Olise cəza sərhədindədir. Xüsusilə Olisenin vəziyyəti diqqət çəkir. Turnirdə artıq beş məhsuldar ötürmə edən hücumçu komandanın əsas fiqurlarından hesab olunur. O, Mərakeşlə oyunda daha bir sarı vərəqə alacağı halda, Fransa yarımfinala yüksəlsə belə, Didier Deşam onu növbəti matçda istifadə edə bilməyəcək.

Mərakeş

Ən riskli vəziyyət Mərakeş millisindədir. İssa Diop, Azzəddin Unahi, Əşrəf Hakimi, Bilal Əl-Hənnus və Reduan Halal cəza təhlükəsi altındadır. Bunlardan xüsusilə Hakimi, Unahi, Diop və Əl-Hənnus əsas heyətin dəyişməz üzvləri sayılır. Onlardan hər hansı birinin mümkün yarımfinalı buraxması komanda üçün ciddi itki ola bilər.

İspaniya

İspaniyada yalnız Ferran Torres sarı vərəqə limitinə yaxındır. O, əsas heyətin daimi üzvü olmasa da, ehtiyatdan daxil olaraq oyunun gedişinə təsir edən futbolçulardandır. Buna baxmayaraq, onun mümkün diskvalifikasiyası komanda üçün ciddi problem hesab edilmir.

Belçika

Belçika millisində yalnız müdafiəçi Brandon Mehele cəza təhlükəsi ilə üz-üzədir. Təcrübəli futbolçu indiyədək bütün görüşlərdə tam oyun keçirib və müdafiə xəttinin əsas simalarından biridir. İspaniyaya qarşı çətin qarşılaşmada onun sarı vərəqə alma ehtimalı kifayət qədər yüksək qiymətləndirilir.

Norveç

Norveç turnirin ən intizamlı komandalarından biri olub. Hazırda yalnız gənc cinah oyunçusu Antonio Nusa sarı vərəqə limitindədir. Norveç İngiltərəni mübarizədən kənarlaşdıracağı halda, Nusanın növbəti xəbərdarlıq alması onu yarımfinaldan məhrum edə bilər.

İngiltərə

Ən çətin vəziyyət İngiltərə millisində müşahidə olunur. Deklan Rays, Cud Bellinqem, Mark Gehi, Niko O'Rayli və Cordan Henderson cəza təhlükəsi altındadır. Henderson artıq zədə səbəbindən turniri başa vurduğundan əsas narahatlıq Rays, Bellinqem və Gehinin ətrafında cəmləşib. Bu futbolçulardan hər hansı biri Norveçlə oyunda sarı vərəqə alarsa, komanda yarımfinala yüksəlsə belə, növbəti matçda iştirak edə bilməyəcək.

Argentina

Argentina millisində yalnız ehtiyat müdafiəçi Qonsalo Montiel risk zonasındadır. O, turnirdə məhdud vaxt aldığı üçün mümkün diskvalifikasiyasının komandanın oyun planına ciddi təsir etməyəcəyi düşünülür.

İsveçrə

İsveçrənin aparıcı yarımmüdafiəçiləri Qranit Caka və Denis Zakariya da cəza həddindədir. Xüsusilə komandanın liderlərindən olan Cakanın mümkün diskvalifikasiyası yarımfinala yüksələcəkləri təqdirdə İsveçrə üçün böyük itki hesab olunur. Müdafiəçi Miro Muhaym da növbəti sarı vərəqəsini alacağı halda cəzalanacaq, lakin onun ehtiyat oyunçu olması səbəbindən bu itki o qədər də kritik sayılmır.

Beləliklə, DÇ-2026-nın 1/4 final mərhələsində komandalar təkcə qələbə uğrunda deyil, həm də aparıcı futbolçularını yarımfinal üçün qorumaq uğrunda mübarizə aparacaqlar. Xüsusilə İngiltərə, Mərakeş və Fransa üçün intizam amili növbəti mərhələyə gedən yolda həlledici rol oynaya bilər.