Almaniyanın hərbi texnika istehsalçısı “Rheinmetall” (Raynmetall) üç ay ərzində Ukraynada zirehli maşınlar zavodu açacaq.

“Report” xəbər verir ki, bu barədə şirkətin baş direktoru Armin Papparger CNN-ə bildirib.

O qeyd edib ki, “Rheinmetall” ukraynalılara orada istehsal olunacaq tanklara və digər avadanlıqlara qulluq etməyi öyrətməyə də başlayacaq.

“[Ukraynalılar] özlərinə kömək etməlidirlər - əgər onlar həmişə avropalıların və ya amerikalıların növbəti on və ya 20 il ərzində onlara kömək etməsini gözləməli olsalar... bu mümkün deyil”, – baş direktor vurğulayıb.

Şirkət zavoda əməkdaşlıq müqaviləsi bağladıqları “Ukroboronprom” ilə birgə sahib olacaq.

Xatırladaq ki, hələ mart ayında “Rheinmetall” Ukraynada ildə 400-ə yaxın avtomobil istehsal edə biləcək 200 milyon avro dəyərində tank zavodu açmağı planlaşdırdığını açıqlamışdı. Daha sonra Rusiya Təhlükəsizlik Şurasının sədr müavini Dmitri Medvedev zavodu “Kalibr” qanadlı raketləri ilə vurmaqla hədələyib, daha sonra “gələcək zavodun dəqiq koordinatlarını göndərməyi” istəyib. Papparger zavodu mümkün zərbələrdən qorumağa çalışacaqlarını diqqətə çatdırıb.