Respublikaçı Cim Cordan ABŞ Konqresinin Nümayəndələr Palatasının spikeri postu uğrunda mübarizəni tərk edib.

“Report”un məlumatına görə, bu barədə yerli KİV, o cümlədən "The Washington Post", "The Hill" və CNN məlumat yayıb.

Daxil olan məlumatlara görə, Konqresin aşağı palatasındakı respublikaçılar Cordanın spiker postuna namizədliyini irəli sürmək cəhdlərindən əl çəkiblər. Qərar son günlər onun namizədliyini təsdiqləmək üçün edilən üç uğursuz cəhddən sonra verilib.

“Reuters” xəbər verir ki, oktyabrın 23-də axşam Nümayəndələr Palatasında respublikaçılar qapalı məsləhətləşmələrin növbəti raundu keçirəcəklər və orada Konqresin aşağı palatasının spikeri vəzifəsinə mümkün namizəd müzakirə olunacaq.

Səsvermə oktyabrın 24-ü səhər saatlarına təyin edilib. Bu günə qədər Kevin Hern və Cek Berqman bu vəzifəyə namizəd olmaq niyyətlərini açıqlayıblar.

“Politico” qəzeti öz mənbələrinə istinadən iddia edir ki, respublikaçı Tom Emmer (Minnesota ştatından) də Nümayəndələr Palatasının spikeri postuna namizəd olmaq imkanını nəzərdən keçirir.

Qeyd edək ki, ABŞ Konqresinin Nümayəndələr Palatası Kevin Makkartinin spiker vəzifəsindən azad edilməsinə səs verib.