“Azərbaycan və Qazaxıstan ticarət dövriyyəsini artırmağı planlaşdırır”.

“AVESTA.AZ” Qazaxıstan Prezidentinin mətbuat xidmətinə istinadən xəbər verir ki, bunu Qazaxıstan Prezidenti Kasım-Jomart Tokayev Azərbaycan Prezidenti İlham Əliyev ilə danışıqların yekunu üzrə mətbuata açıqlamasında deyib.

“Ötən ilin yekunlarına əsasən, iki ölkə arasında ticarət dövriyyəsi praktiki olaraq 3 dəfə artıb. Lakin qeyd etmək istərdim ki, bu, arxayınlaşmağa əsas vermir, çünki fikrimcə, ticarəti artırmaq üçün hər halda imkanlar var. Ölkələrimizin hökumətləri məhz bu istiqamətdə işləməlidirlər ki, mənim fikrimcə, artıq lap yaxın vaxtlarda biz ölkələrimiz arasında ticarətin həcmini 1 milyard dollara çatdıra bilək”, - o bildirib.

Onun sözlərinə görə, ölkələr mədəni-humanitar sahədə əməkdaşlığı inkişaf etdirmək niyyətindədir: “Bu gün mən ölkəmizdə Azərbaycan mədəniyyəti ongünlüyünün keçirilməsi təşəbbüsü ilə çıxış etdim. Bu tədbirin maraqla qarşılanacağına heç bir şübhəm yoxdur, çünki xalqımız Azərbaycan mədəniyyəti üçün, Azərbaycanın görkəmli incəsənət xadimləri üçün darıxıb”.

“Bu gün dövlətlərimiz arasında əməkdaşlığın nəqliyyat-logistika sahəsi ilə bağlı inkişafı barədə ətraflı danışdıq. Hökumətlərimizə müvafiq tapşırıqlar verilib və bu istiqamətdə konkret nəticələrin əldə olunacağına şübhə yoxdur. İstənilən halda, Qazaxıstan bu cür əməkdaşlığı inkişaf etdirməkdə maraqlıdır”, - Tokayev əlavə edib.

Qazaxıstan Prezidenti kənd təsərrüfatı sektoru ilə bağlı əməkdaşlığa da toxunub: “Bu sahədə bir-birimizi tamamlayan cəhətlərimiz var. Bildiyiniz kimi, Qazaxıstan taxıl, buğda və digər kənd təsərrüfatı məhsullarını tədarük etmək imkanına malikdir. Bizim Azərbaycandan kənd təsərrüfatı məhsulları - meyvə-tərəvəz idxalına da ehtiyacımız var. Bir sıra Qazaxıstan istehsalçıları Azərbaycana ümumi dəyəri 300 milyon dollardan çox olan 100 adda məhsulun tədarükünü artırmağa hazırdır. Buna görə də bu ticarətin logistikasını təmin etməliyik. Bu, bizim bu gün razılaşdığımız kimi, hökumətlərimizin qarşısında duran vəzifədir”.