Azərbaycanda heç vaxt dini baxışa, inanca görə təzyiq olmayıb.

Bunu "AVESTA.AZ"a açıqlamasında Bakı Yəhudi Məktəbinin direktoru, Azərbaycan-Gürcü Yəhudi İcmasının sədri ravvin Zamir İsayev deyib.

ABŞ Dövlət Departamentinin Azərbaycanı dini etiqad azadlığının ciddi şəkildə pozulmasına və ya buna dözümlülüyünə görə özünün “xüsusi izləmə siyahısı”na daxil etmək qərarına münasibət bildirən ravvin bunu absurdluğun təzahürü adlandırıb: “Hesab edirik ki, bu, Azərbaycana münasibətdə ikili standartların növbəti təzahürüdür. İnsanları dini dözümsüzlük nümayiş etdirməkdə ittiham etmək cəhdləri sadəcə olaraq gülünc və əsassızdır”.

Ravvin qeyd edib ki, Azərbaycanda nə keçmişdə, nə də indiki dövrdə yəhudi icması heç vaxt antisemitizmlə qarşılaşmayıb: “Azərbaycanın yəhudi icması inkişaf edir. O, heç vaxt antisemitizmlə qarşılaşmayıb. Biz ancaq dövlət tərəfindən dəstək görürük”.

Zamir İsayev xatırladıb ki, Azərbaycandakı yəhudi məktəblərində dövlət təhsil proqramı çərçivəsində yəhudi xalqının mədəniyyəti, tarixi və adət-ənənələri öyrənilir: “Bu, dövlətin bizə olan münasibətini, cəmiyyətimizin təkcə bu gününü deyil, həm də gələcəyini düşündüyünü göstərir”.

O bildirib ki, ölkədəki sinaqoqlarda heç bir maneə olmadan ibadətlər həyata keçirilir.

Onun sözlərinə görə, Yaxın Şərqdə davam edən münaqişəyə baxmayaraq, əsasən müsəlmanların yaşadığı Azərbaycanda yəhudi icması hətta məişət səviyyəsində heç bir təzyiq hiss etməyib: “Burada mehriban qonşuluq, qardaşlıq münasibətləri hər şeyə rəğmən davam edir”.