Qafqaz Müsəlmanları İdarəsinin (QMİ) təqviminə əsasən, martın 1-dən etibarən müqəddəs Ramazan ayı başlayır. Dünyanın müxtəlif ölkələrində olduğu kimi, Azərbaycanda da milyonlarla insan bu ayı oruc tutaraq qarşılayacaq.

AVESTA.AZ-in məlumatına görə, oruc təkcə dini bir ibadət deyil, eyni zamanda insan sağlamlığına və mənəvi rahatlığa da təsir edən mühüm bir prosesdir.

Aclıq və susuzluğa dözmək bədənin özünü yeniləməsinə imkan yaradır, eyni zamanda insanı səbrli, iradəli və mərhəmətli olmağa sövq edir.

Lakin orucun insan orqanizminə müsbət təsirləri də kifayət qədərdir.

Oruc tutmağın insan orqanizminə faydaları

Mədə-bağırsaq sisteminin istirahəti: Oruc zamanı həzm sistemi fasilə verdiyi üçün bağırsaqlar və mədə özünü bərpa edir. Bu, həzm problemlərinin azalmasına və qastritin yüngülləşməsinə kömək edə bilər.

Toksinlərin bədəndən atılması: Uzun müddət qida qəbul edilmədikdə, bədən daxili ehtiyatlarını işə salır və zərərli maddələri xaric etməyə başlayır. Bu, orqanizmin təmizlənməsinə və ümumi sağlamlığın yaxşılaşmasına kömək edir.

Çəki azalması və metabolizmin sürətlənməsi: Oruc tutmaq bədəndə piylərin parçalanmasını sürətləndirir. Nəticədə artıq çəki problemi olan insanlarda arıqlama müşahidə olunur.

İmmunitetin güclənməsi: Bəzi araşdırmalar göstərir ki, oruc immun sistemini gücləndirə bilər. Xüsusilə də bədəndə köhnə hüceyrələrin yenilənməsinə və daha sağlam hüceyrələrin yaranmasına kömək edir.

Qan şəkərinin tənzimlənməsi: Oruc insulin səviyyəsini aşağı salaraq şəkər xəstəliyi riskini azalda bilər. Ancaq diabet xəstələri həkim məsləhəti olmadan oruc tutmamalıdır.

Psixoloji rahatlıq: Oruc insanı pis vərdişlərdən uzaqlaşdıraraq mənəvi və psixoloji rahatlıq gətirir. İnsan öz emosiyalarına daha yaxşı nəzarət etməyi öyrənir.

Oruc tutmaq düzgün və sağlam şəkildə yerinə yetirildikdə orqanizm üçün çox faydalıdır. Lakin hər kəsin bədən quruluşu və sağlamlıq vəziyyəti fərqlidir. Buna görə də, oruc tutmaq istəyən insanlar öz sağlamlıq vəziyyətini nəzərə almalı və ehtiyac olduqda mütəxəssislə məsləhətləşməlidirlər.

Ramazan ayında kimlərə oruc tutmaq vacib deyildir?

Dörd təbəqədən olan adamlar oruc tutmaya bilərlər; onlar həm qəza orucundan, həm də kəffarədən azaddırlar:

Həddi-büluğa çatmamış uşaqlar;

Psixi cəhətdən qeyri-normal şəxslər;

Qocalıb əldən düşmüş şəxslər;

Aclıq və susuzluğa heç cür tab gətirməyən daimi xəstələr.

Orxan Hüseyn