Həkim Elman Əzimovun "Mərcan Medicare Clinic" xəstəxanasında əməliyyat zamanı sterilliyə əməl etmədiyi ilə bağlı iddia səsləndirilib.

AVESTA.AZ Oxu.Az-a istinadən xəbər verir ki, sözügedən həkimin burun əməliyyatı icra edən zaman pasiyentə nəql olunacaq qığırdağı yerdə, steril olmayan şəraitdə əzdiyi əks olunan video paylaşılıb.

Həmçinin bildirilib ki, ümumi cərrah olan Elman Əzimov lor və estetik cərrah ixtisası olmadan müvafiq əməliyyatları icra edir.

Məsələyə aydınlıq gətirmək üçün Oxu.Az-ın müraciət etdiyi "Mərcan Medicare Clinic"dən bildirildi ki, bununla bağlı heç bir məlumat verə bilməzlər, sualları həkim özü cavablandıra bilər.

Həkim Elman Əzimov isə Oxu.Az-a verdiyi açıqlamada sözügedən iddiaların yanlış olduğunu dedi:

"Bu gün bütün dünyada xəstədən çıxarılan patoloji materiallar yerdə müayinə edilir. Bu, istənilən ölkədə, həmçinin Türkiyə, ABŞ, Yaponiya, Koreyada da belədir. Çünki bunun başqa bir yolu yoxdur, hələ ki, yeni bir şey kəşf edilməyib. Materialın müayinəsi üçün yerə steril olmayan və ya steril olan yaşıl mələfə sərilir, onun üzərində də proses icra olunur. Adətən, bu prosesin icrası zamanı steril olan yaşıl mələfədən istifadə edilir. Yerdə olduğu üçün də ya əyilməlisən, ya da oturub bunu icra etməlisən. Patoloji material sümük, qığırdaq, ət toxuması və s. ola bilər. İstənilən həkimdən soruşsanız, müayinənin bu qaydada aparıldığını görəcəksiniz. Burada patoloji materialın müayinəsindən söhbət gedir".

O, görüntünün hansı məqsədlə çəkildiyini bilmədiyini söyləyib:

"Əməliyyatda olan bir hadisədir. Bunu şou formasına salıb təqdim etmək düzgün deyil. Videonu kim çəkib, niyə çəkib - mən bilmirəm. Sözügedən məsələ əməliyyat vaxtı təkrar olunur. Onda gərək bütün əməliyyatlar bu formada çəkilib təqdim oluna. Bu, düzgün bir şey deyil".

Həkim lor və estetik cərrah ixtisasının olmadığı barədə iddialara da cavab verib:

"Mən ümumi cərraham. Uzun müddət estetik cərrah kimi həm Türkiyədə, həm Azərbaycanda təcrübəm var. Estetik əməliyyatlarla bağlı dərs vəsaitlərinin yazılmasında yaxından iştirak edirəm. Eyni zamanda, Tibb Universitetində rezidentlərin rəhbəriyəm. Bu sahədə də bizim geniş fəaliyyətimiz var. Öncül şəxslərdənik.

Bizdə estetik sahənin inkişafında rezidentura təhsili olmadığına görə bu sahə ilə ümumi cərrahlar məşğul olurlar. Türkiyədə də belədir. Türkiyədə 1986-cı ildə plastik cərrahiyyə meydana gələndə plastik cərrah yox idi. Orada çalışanlar ümumi cərrahlar idi. Bu sahədə onların çalışmasına icazə verildi. Bizdə də hazırda keçid dövrüdür. Belə formalaşıb, belə də davam edir. Bizim də ömrümüz keçir, biliklərimizi gənc rezidentlərə öyrədirik ki, plastik cərrahiyyə sahəsində ixtisaslaşsınlar. Onlar da bunu kimdənsə öyrənməlidirlər. Xaricdən bunun üçün mütəxəssis dəvət olunmayıb ki, öz mütəxəssislərimizdir. Azərbaycanda onlara təhsil veririk.

Ümumi cərrahiyyədə də estetik bölümlər var. Dərslərdə estetik prosedurların icrası tədris olunur. Bizim də estetik prosedurların icrası və əməliyyatların estetik prinsiplərə uyğun sonlandırılması ilə bağlı icazəmiz var. Yumşaq toxumalarla işləyir və ya ətrafların amputasiyası zamanı insanı rekonstruksiya edirik. Buna da bizim ixtiyarımız çatır".