"Dövlət İmtahan Mərkəzi bəzi sualların texniki səhvlərlə hazırlandığını etiraf edib və onların ləğv ediləcəyini bildirib. Bu cür hallar yüksək bal toplayanların nisbətinin azalmasına gətirib çıxara bilər və nəticə etibarilə bəzi ixtisaslarda keçid ballarında enmə müşahidə oluna bilər".

Bunu BAKU.WS-ə açıqlamasında təhsil eksperti Kamran Əsədov deyib. 

Ekspert həmçinin bildirib ki, bu il qəbul imtahanlarında iştirak etmək üçün 130 mindən çox abituriyent qeydiyyatdan keçib. Bu, 2024-cü illə müqayisədə 12 min nəfər çoxdur:

"Bununla yanaşı, dövlət və özəl universitetlər üzrə ümumi plan yerlərinin sayı da artmışdır. 2024-cü ildə 43 minə yaxın plan yeri təqdim olunmuşdusa, bu il bu rəqəm təxminən 44 minə çatıb. Dövlət sifarişi əsasında qəbul ediləcək tələbələrin sayı da ümumi yerlərin 60%-dən çoxunu təşkil edir. Bu dinamika qəbul imkanlarının bir qədər genişləndiyini göstərir. Lakin eyni zamanda 2025-ci ildə keçirilən qəbul imtahanlarının çətinlik səviyyəsi ilə bağlı geniş ictimai narazılıq müşahidə olunur. Riyaziyyat, fizika, tarix və kimya fənləri üzrə təqdim olunan bəzi testlərin mövzu dərinliyi və forması, xüsusilə II və IV ixtisas qruplarında iştirak edən abituriyentlərin çətinlik yaşamasına səbəb olub. Dövlət İmtahan Mərkəzi də bəzi sualların texniki səhvlərlə hazırlandığını etiraf edib və onların ləğv ediləcəyini bildirib. Bu cür hallar yüksək bal toplayanların nisbətinin azalmasına gətirib çıxara bilər və nəticə etibarilə bəzi ixtisaslarda keçid ballarında enmə müşahidə oluna bilər".

K. Əliyev onu da vurğulayıb ki, dövlət tərəfindən təqdim olunan plan yerlərinin həcminin artması daha çox abituriyentin təhsil alma imkanını genişləndirir:

"Əlavə olaraq, bəzi regionlarda yeni filialların açılması və yerlərdə ixtisasların genişləndirilməsi regional balansın qorunmasına xidmət edir. Eyni zamanda, əmək bazarına uyğun yeni ixtisasların – süni intellekt, kibertəhlükəsizlik, tibb mühəndisliyi və maliyyə analitikası kimi sahələrin ali təhsil sisteminə daxil edilməsi perspektivli addım kimi qiymətləndirilə bilər".

Banu Hüseynli