Hindistan Azərbaycanın Şanxay Əməkdaşlıq Təşkilatına (ŞƏT) üzvlük müraciətini yenidən bloklayıb.

Çin Azərbaycanın ŞƏT-ə üzvlüyünü dəstəkləsə də, Hindistan yenidən analoji yanaşma nümayiş etdirib. Hindistanın ermənipərəst mövqeyini, Ermənistanı dəfələrlə hücum silahları ilə silahlandırdığını, həmçinin Azərbaycan və Pakistanın sıx əlaqələri nəzərə alsaq, Yeni Delhinin atdığı addımın qərəzli, çoxtərəfli diplomatiya prinsiplərinə və "Şanxay ruhu"na zidd olduğunu görərik. Həmçinin bu mövqe Hindistanın məhdud yanaşmasını nümayiş etdirir.

Milli Məclisin Hüquq siyasəti və dövlət quruculuğu komitəsinin üzvü, deputat Nizami Səfərov Oxu.Az-a açıqlamasında bildirib ki, Hindistanın Azərbaycanın Şanxay Əməkdaşlıq Təşkilatında tamhüquqlu üzvlüyünə qarşı çıxması çoxtərəfli beynəlxalq qurumun əsas təsis sənədi olan Xartiyasına uyğun gəlmir:

"Təşkilatın məqsəd və vəzifələrini müəyyən edən Xartiyanın 1-ci maddəsində göstərilir ki, onun əsas məqsədləri dövlətlər arasında qarşılıqlı etimadın, dostluğun və mehriban qonşuluğun möhkəmləndirilməsi, sülhün, təhlükəsizliyin və sabitliyin qorunub-saxlanılması, yeni demokratik, ədalətli və rasional siyasi və iqtisadi beynəlxalq nizamın qurulmasına kömək etmək məqsədilə əməkdaşlığın inkişaf etdirilməsi, üzv dövlətlərin beynəlxalq öhdəliklərinə və onların milli qanunvericiliyinə uyğun olaraq insan hüquq və əsas azadlıqlarının təşviq edilməsindən ibarətdir. Bu fundamental məqsədlərin əleyhinə olaraq, Hindistan qeyri-konstruktiv, diplomatik müstəvidə qəbulolunmaz bir davranış nümayiş etdirir".

"Xatırladım ki, Hindistandan fərqli olaraq, Çin Xalq Respublikasının rəhbərliyi ölkəmizin təşkilata üzvlüyünü birmənalı olaraq dəstəkləyib və onun "Şanxay ruhu" prinsiplərinə uyğun olduğunu bildirib. Hər hansı bir problemi rəhbər tutaraq, Hindistan tərəfindən çoxtərəfli beynəlxalq əməkdaşlığa əngəllər yaradılması ümumiyyətlə diplomatiya sahəsində qəbul edilməyən və təşviq olunmayan davranışdır və BMT-nin Baş Assambleyası tərəfindən 24 oktyabr 1970-ci il tarixində 2625 (XXV) saylı qətnamə ilə qəbul edilmiş "Birləşmiş Millətlər Təşkilatının Nizamnaməsinə uyğun olaraq Dövlətlər arasında dostluq münasibətləri və əməkdaşlığa dair beynəlxalq hüququn prinsipləri haqqında Bəyannamənin" kobud formada pozulmasıdır", - deyə millət vəkili vurğulayıb.

Parlamentari əlavə edib ki, Hindistanın mövqeyi Azərbaycanın Pakistan ilə qardaşlıq münasibətləri ilə bağlıdır:

"Ancaq heç kəs unutmamalıdır ki, Azərbaycan beynəlxalq müstəvidə həm ikitərəfli, həm də çoxtərəfli əməkdaşlığın tərəfdarı olması və bu istiqamətdə fəaliyyətini səmərəli şəkildə həyata keçirməsi ilə yanaşı, suveren dövlət olaraq heç bir halda imkan verməyəcək ki, kimlərsə ölkəmizə qarşı təzyiq etsinlər".