Bakı Ağır Cinayətlər Məhkəməsi yetkinlik yaşına çatmayan bir yeniyetmənin dostunu bıçaqla yaralaması və qanunsuz silah saxlaması ilə bağlı cinayət işinə baxıb.

Məhkəmənin hökmü ilə təqsirləndirilən şəxs Azərbaycan Respublikası Cinayət Məcəlləsinin 126.1-ci (qəsdən ağır bədən xəsarəti yetirmə) və 228.4-cü (qanunsuz soyuq silah saxlama) maddələri ilə təqsirli bilinib.

AVESTA.AZ-in məlumata görə, Hadisə 2024-cü ilin iyul ayında Bakı şəhəri, Qaradağ rayonu, Qobustan qəsəbəsində yerləşən "Təbriz Topdan və Pərakəndə Satış" mağazasının anbarında baş verib.

2007-ci il təvəllüdlü təqsirləndirilən şəxs iş yoldaşı və dostu olan zərərçəkmişlə zarafatlaşarkən qatlanan ov bıçağı ilə onun qarın nahiyəsinə zərbə endirib. Nəticədə zərərçəkmiş qaraciyər və bağırsaq zədələnməsi, habelə qabırğa sınığı ilə ağır xəsarət alıb və xəstəxanaya yerləşdirilib.

Məhkəmə iclaslarında zərərçəkmiş şəxs ifadəsində bildirib ki, hadisə təsadüfi olub və təqsirləndirilən şəxslə barışıb, ona qarşı heç bir şikayəti yoxdur. O, hətta məhkəmədən təqsirləndirilən şəxsə cəza təyin edilməməsini xahiş edib.

Lakin məhkəmə-tibbi ekspertiza nəticələri xəsarətin qəsdən yetirildiyini və təsadüfi olmadığını təsdiqləyib. Ekspert qeyd edib ki, zərbə güclü olub və sadə qucaqlama və ya itələmə ilə belə dərin yara yaranmazdı.

Şahidlərin ifadələri də hadisənin detallarını işıqlandırıb. Bəzi şahidlər hadisənin zarafat zamanı baş verdiyini, digərləri isə təqsirləndirilən şəxsin bıçağı qutu açmaq üçün istifadə etdiyini bildirib. Təqsirləndirilən şəxsin qanuni nümayəndələri və qohumları onun peşman olduğunu və ilk dəfə cinayət məsuliyyətinə cəlb olunduğunu vurğulayıblar.

Məhkəmə təqsirləndirilən şəxsə 126.1-ci maddə ilə 3 il, 228.4-cü maddə ilə 4 ay azadlıqdan məhrum etmə cəzası təyin edib. Bu cəzalar qismən toplanaraq ümumilikdə 3 il 2 ay azadlıqdan məhrum etməyə çevrilib. Lakin Cinayət Məcəlləsinin 70-ci maddəsinə əsasən, cəza şərti olaraq tətbiq olunub və 6 ay sınaq müddəti müəyyən edilib.