"Dövlət sifarişi əsasında təhsil alan tələbələrdən hər hansı formada ödəniş tələb olunması qanunvericiliyə ziddir. Belə tələbələrin təhsil xərcləri dövlət büdcəsi hesabına qarşılanır və bununla bağlı hər hansı maliyyə yükü tələbənin üzərinə qoyula bilməz".

Bununla bağlı AVESTA.AZ-in sorğusuna cavab olaraq Agentliyin mətbuat xidmətindən məlumat verilib.

Qeyd olunub ki, bu baxımdan, təhsil müəssisəsinin özəl statusu dövlət sifarişi əsasında qəbul olunmuş tələbələrin maliyyələşdirilməsi ilə bağlı dövlət tərəfindən müəyyən edilmiş hüquqi rejimi dəyişmir:

"Təhsil müəssisəsinin daxili maliyyə planlaşdırması, ayrılmış vəsaitin idarə olunması, yaxud ilin sonuna istifadə olunmamış vəsaitlə bağlı yaranmış hallar tələbələr üçün əlavə öhdəlik yaratmır. Universitet tərəfindən maliyyə məsələlərinin düzgün tənzimlənməməsinin nəticəsinə görə tələbə cavabdeh deyil".

"Məsələ ilə bağlı aidiyyəti ali təhsil müəssisəsinin müraciətinə qanunvericiliyin tələblərinə uyğun olaraq baxılıb və rəsmi qaydada cavab verilib. Bildirilib ki, "Büdcə sistemi haqqında" Azərbaycan Respublikası Qanununun 19.5-ci maddəsinə əsasən, ilin sonunda istifadə olunmamış və vahid xəzinə hesabına köçürülmüş vəsaitin geri qaytarılması Elm və Təhsil Nazirliyinin səlahiyyətləri çərçivəsində mümkün deyil", - deyə vurğulanıb.

***2026-04-01 saat-14:03

Məlumat üçün bildiririk ki, dövlət sifarişi əsasında təhsil alan tələbələrdən təhsil haqqı formasında hər hansı ödənişin tələb olunması qanunaziddir.

Bu barədə AVESTA.AZ-in sorğusuna cavab olaraq Agentliyin mətbuat xidmətindən məlumat verilib.

"Dövlət sifarişi ilə təhsil alan tələbələrin təhsil haqları dövlət tərəfindən müvafiq qaydada təhsil müəssisələrinə ödənilir. Bu baxımdan, nə dövlət, nə də özəl ali təhsil müəssisəsi tələbədən həmin ödənişin hər hansı bir hissəsini tələb edə bilməz", - deyə məlumatda qeyd olunub.

***12:32

Qeyd olunan məsələ ilə bağlı Elm və Ali Təhsil üzrə Dövlət Agentliyi tərəfindən araşdırma aparılır, sözügedən özəl ali təhsil müəssisəsinə məsələnin həlli istiqamətində müvafiq tövsiyələr verilib.

Bu barədə AVESTA.AZ-in sorğusuna cavab olaraq Agentliyin mətbuat xidmətindən məlumat verilib.

"Nəticə barədə ətraflı məlumat ictimaiyyətə təqdim olunacaq", - deyə vurğulanıb.

***10:29

Qərbi Kaspi Universitetinin bəzi tələbələri narazıdır.

Bu barədə şikayətlər AVESTA.AZ-in "qaynar xətti"nə daxil olub.

Bildirilir ki, universitetdə dövlət sifarişi əsasında təhsil alan bəzi tələbələrdən 375,08 manat məbləğində ödəniş tələb olunur. İddia olunur ki, bu məbləği ödəməyən tələbələr imtahanlara buraxılmayacaqları ilə bağlı xəbərdar ediliblər.

Məsələ ilə bağlı Azərbaycan Respublikasının Elm və Təhsil Nazirliyi ilə əlaqə saxlayan tələbələrə bildirilib ki, dövlət sifarişi ilə təhsil alan şəxslərdən əlavə ödəniş tələb edilməsi qanunvericiliyə uyğun deyil və əsassızdır.

Sözügedən halla bağlı biz də nazirliyə sorğu ünvanladıq. Universitetlə isə təəssüflər olsun ki əlaqə qurmaq mümkün olmayıb.

Banu Hüseynli