Mənzil təminatı ilə bağlı hökumət bütün maliyyələşməni üzərinə götürməməlidir.

BAKU.WS "Report"a istinadən xəbər verir ki, bunu Afrikada Əlçatan Mənzil Maliyyəsi Mərkəzinin təsisçisi və icraçı direktoru Kesia Rast Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində təşkil olunmuş "Mənzil Maliyyələşdirilməsi üçün Yeni Razılaşma" adlı tədbirdə bildirib.

"Beləliklə, kimin hansı rolu oynamalı olduğu barədə düşünsək, mərkəzi hökumət müəyyən çərçivə təyin edəcək, lakin mərkəzi hökumətin bütün pulu mütləq özünün qoymalı olduğunu düşünməsi məni çox narahat edir. Onlar sadəcə bir neçə yerdə "alov yandırmalıdırlar" – bəlkə də bu, ən yaxşı metafora deyil – amma hər halda müxtəlif yerlərdə fəallıq səviyyəsini stimullaşdırmaq üçün bir yol tapmalıdırlar. Bizim risk qiymətləndirməmiz qeyri-formal məşğul olan ev təsərrüfatları ilə necə işləməli olduğumuz baxımından çox dar, dar düşüncəlidir. Halbuki Hindistanda, eləcə də Afrikanın digər yerlərində və müxtəlif ölkələrdə qeyri-formal gəlirlərin anderraytinqi (qiymətləndirilməsi) ilə bağlı çox gözəl işlər görülür. Bu isə o deməkdir ki, həmin kapitala həqiqətən ehtiyacı olan insanların tələbatını qarşılayan və onlara cavab verən maliyyələşdirməni necə təklif etmək barədə yenidən hesablama və kalibrləmə aparılmalıdır", - deyə o qeyd edib.

Qonağın sözlərinə görə, mərkəzi hökumət və bələdiyyə hökumətləri liderlik rolu oynamalıdırlar, lakin bu rol birbaşa fond ayırmaqda, maliyyələşdirməkdə və ya subsidiyalaşdırmaqda olmamalıdır: "Cənubi Afrikanın mənzil subsidiyaları sahəsində uzun bir tarixi var və bu subsidiyalar ölkədə çox gözəl işlərə vəsilə olub, lakin eyni zamanda bazarda formalaşa biləcək və fəaliyyət göstərə biləcək bəzi iştirakçıları və sahibkarlıq fəaliyyətlərini sıxışdırıb çıxarmağa başlayıb".