2022-ci ildə və 2023-cü ilin yanvar-sentyabr aylarında Şəmkir, Tovuz, Qazax, Ağstafa və Gədəbəy rayonlarında torpaq qanunvericiliyinin pozulması ilə bağlı 400-ə yaxın hal aşkar edilərək sənədləşdirilib.

Bu barədə "Report"a İqtisadiyyat Nazirliyi yanında Əmlak Məsələləri Dövlət Xidmətindən bildirilib.

Məlumata görə, son 2 ildə sözügedən ərazilərdə torpaq qanunvericiliyinin pozulması hallarına dair müvafiq torpaq istifadəçiləri barədə 152 inzibati protokol tərtib edilib, 75 min manata yaxın cərimə tətbiq olunub.

Dövlət Xidmətinin apardığı monitorinqlərin, rayon icra hakimiyyətlərindən alınmış məlumatların təhlili göstərir ki, bu rayonlarda bəzi hallarda kənd təsərrüfatına yararlı torpaq sahələri təyinatı üzrə istifadə olunmur, qanunvericiliyinin tələbləri pozulmaqla torpaqlar əkin dövriyyəsindən çıxarılır və münbit qatı korlanır, yararlı əkin, örüş və otlaq sahələri qeyri-kənd təsərrüfatı məqsədləri üçün əsassız olaraq verilir və yaxud zəbt edilir.