Ramazan ayı İslam dinində ən müqəddəs və fəzilətli aylardan biri hesab edilir.

AVESTA.AZ-in məlumatına görə, bu ayda Qurani-Kərim nazil olmuş, müsəlmanlar üçün oruc tutmaq vacib buyurulmuşdur.

Müqəddəs Ramazan yalnız ac və susuz qalmaq deyil, həm də mənəvi paklanma, səbir, mərhəmət və Allaha yaxınlaşma ayıdır. Müsəlmanlar gün boyu yemək, içmək və digər orucu pozan hallardan uzaq duraraq, öz iradələrini gücləndirir, ruhən və cismən saflaşırlar.

Oruc tutmaq İslam dinində vacib əməllərdəndir, lakin bəzi şəxslər bu ayda oruc tutmasa, onlar üçün üzrlü sayılır. 

Ramazan ayında kimlərə oruc tutmaq vacib deyil?

Dörd təbəqədən olan adamlar oruc tutmaya bilərlər; onlar həm qəza orucundan, həm də kəffarədən azaddırlar:

1. Həddi-büluğa çatmamış uşaqlar;
2. Psixi cəhətdən qeyri-normal şəxslər;
3. Qocalıb əldən düşmüş şəxslər;
4. Aclıq və susuzluğa heç cür tab etməyən daimi xəstələr.

Daha dörd təbəqədən olan şəxslər isə Ramazan ayında oruc tutmaya bilərlər; bunun üçün onlara kəffarə də düşmür, sadəcə olaraq itirdikləri hər gün əvəzinə bir gün qəza orucu onlara vacibdir:

• Hamilə qadınlar. Onlar itirdikləri hər günün əvəzində ehtiyaclılara 750 qram yemək verməli, ana olduqdan sonra isə qəza oruclarını tutmalıdırlar.
• Körpəsinə süd verən qadın (əgər oruc tutduğu təqdirdə südünün kəsiləcəyindən qorxarsa). Onlar da hər gün üçün 750 qram ehsan etməli, südvermə müddəti bitdikdən sonra qəza orucu tutmalıdır.
• Qadınlar paklıq vəziyyətləri pozulduğu günlərdə oruc tutmamalı, lakin sonra mütləq qəza etməlidirlər (hər gün müqabilində bir gün hesabı ilə).
• Ramazan ayında müvəqqəti xəstələnmiş şəxslərin səhhətinə oruc tutmaq təhlükə törədirsə, xəstə olduqları günlərdə orucdan azaddırlar. Əgər gələn ilin Ramazan ayına qədər sağalsalar, mütləq qəza orucu tutmalıdırlar. Gələn ilədək sağalmasalar, qəza orucu vacib olmaz, yalnız hər gün üçün 750 qram ehsan etmələri kifayətdir.