Talassemiyalı uşaqlar üçün toplanmış bir milyon manata yaxın vəsaiti mənimsəməkdə təqsirləndirilənlər Nuridə Seyidova, Aynur Bayramova və Aysel Məmmədovanın cinayət işi üzrə növbəti məhkəmə prosesi keçirilib.

BAKU.WS xəbər verir ki, Bakı Ağır Cinayətlər Məhkəməsində hakim Azad Məcidovun sədrliyi ilə keçirilən proses zərərçəkənlərin ifadələri ilə davam etdirilib.

Övladı talassemiyadan əziyyət çəkən Şövkət İsayeva zərərçəkən kimi ifadə verərək vurğulayıb ki, övladının Türkiyədə müalicə olunmağı üçün təqsirləndirilən şəxslərlə görüşərək onlara 30 min dollar verib. Aradan bir müddət keçsə də, uşağın müalicəsi ilə bağlı hər hansı bir məlumat verilməyib. Bundan sonra xəstənin valideynləri Türkiyədəki xəstəxana ilə əlaqə saxladıqdan sonra məlum olub ki, bu barədə onlara müraciət olunmayıb.

Digər zərərçəkən Şahsuvar Paşayev də övladının müalicəsi ilə bağlı onlara 30 min dollar verdiyinə baxmayaraq, qarşılığında hər hansı bir müalicənin aparılmadığını deyib:

"Aynur xanımla Talassemiya Mərkəzində Xuraman xanımın vasitəsilə tanış olmuşuq. Nuridə Seyidovaya 30 min dollar vermişəm, lakin uşağı əməliyyat etmədilər. Pulum da batdı".

Buna münasibət bildirən Nuridə Seyidova deyib ki, pulu götürüb və Aynur Bayramovaya verib: "Aynurun uşağı xəstə olduğu üçün pulu o götürdü".

Tanınmış həkim Mircəlal Kazıminin adı bu dəfə də zərərçəkənlər tərəfindən prosesdə hallandırılıb.

Zərərçəkən Elnarə Xanmirzəyevanın oğlu Cahangir Xanmirzəyev şahid kimi ifadəsində bildirib ki, atası qaraciyər sirrozundan əziyyət çəkdiyi üçün onun müalicəsi ilə bağlı həkim axtarışında olublar:

"Bizi bu şəxslərə Gömrük Hospitalının həkimi Mircəlal Kazımi yönəltdi. Buna görə onlara 25 min manat verdik. Amma atamı əməliyyat etmədilər. Mircəlal həkimə bu barədə dedim. Bildirdi ki, onlar bizi də pis vəziyyətdə qoyublar, biabır ediblər".

Növbəti proses martın 19-na təyin edilib.

Qeyd edək ki, talassemiya xəstələrinin valideynlərinə, digər ağır xəstələrə, onların yaxınlarına qarşı dələduzluq edilməsi ilə bağlı daxili işlər orqanlarına məlumat daxil olub. Məlumat əsasında cinayət işi başlanılıb. Müəyyən edilib ki, Nuridə Seyidova Aysel Məmmədova və Aynur Bayramova ilə əlbir olaraq 36 nəfərin etibarından sui-istifadə edərək 980 min manatlarını mənimsəyib. Əvvəlcə Nuridə Seyidova həbs olunub. Daha sonra məhkəmə proseslərində Aynur Bayramova və Aysel Məmmədova barəsində həbs qətimkan tədbiri seçilib.

Təqsirləndirilən şəxslərə qarşı Cinayət Məcəlləsinin 178.3.2-ci (dələduzluq - külli miqdarda ziyan vurmaqla törədildikdə) maddəsi ilə ittiham irəli sürülüb.