"Xocalı. Son toy" filminin ideyası bir fotodan yaranıb. Həmin foto Xocalıda yarımçıq qalmış sonuncu toyda çəkilmişdi.

AVESTA.AZ xəbər verir ki, bu sözləri filmin ideya və ssenari müəllifi Niyam Şirinov Azərbaycan Televiziyasında yayımlanan "Günə davam" verilişində söyləyib.

"Xocalı ilə bağlı çəkilmiş bir çox görüntülər var, ən məşhuru isə Xocalıda yarımçıq qalan sonuncu toydan olan və filmin yaranmasına səbəb olan foto idi. 2020-cil il fevralın 26-da məhz həmin gün mən həmin gəlini tapdım və müsahibə aldım. Elə orda söz verdik ki, bu söhbətimizin davamını torpaqlarımız azad olunandan sonra Xocalıda – elə doğma yurdlarında edəcəyik. Torpaqlarımız geri qaytarıldı və bizim müsahibədəki söhbətimiz reallaşdı".

Filmin quruluşcu rejissoru Yusif Ələkbərzadə bildirib ki, film "Global Media Group" un və Report İnformasiya Agentliyinin dəstəyi ilə reallaşıb.

O qeyd edib ki, film 2 hissədən ibarətdir, bədii hissə Ağsunun Ləngəbiz kəndində, digər hissə isə Xocalıda, fotoda olan, eyni zamanda həmin toyda iştirak etmiş 40-a yaxın Xocalı sakinin iştirakı ilə çəkilib.

"Musiqiçilərdən tutmuş, xonça bəzəyənlərə həmin adamları axtarıb taparaq Xocalıya aparıb çəkiliş etmişik. Bir - iki nəfərlə Xocalıya getmək ayrı, 33 il əvvəl Xocalını görmüş 40 insanla getmək və onların təəssüratlarına şahidlik etmək sözlə ifadə olunmayacaq duyğulardır".

Y.Ələkbərzadə bildirib ki, filmdə həmin hadisələr barədə indiyə qədər heç yerdə göstərilməyən videokadrlar da yer alıb:

"Xocalı hadisələrini o dövrdə iki operatorumuz Çingiz Mustafayev və Seyidağa Mövsümov lentə almışdı. Amma bu filmi çəkəndə məlum oldu ki, Xocalı sakinlərindən birinin- Şakir Məmmədovun kamerası olub və onda heç bir yerdə olmayan kadrlar var. Belə ki, faciə anında da kamerasını yanından qoymayıb onu da çəkməyə başlayıb. Sağ olsun ilk dəfə arxivini bizim üçün açdı və filmimizdə insanların ilk dəfə görə biləcəyi kadrlardan istifadə olundu".

Qeyd edək ki, filmin layihə rəhbəri "Global Media Group" İdarə Heyətinin sədri Elnur Nazim oğlu Abdullayev, ideya və ssenari müəllifi Niyam Şirinov, quruluşçu rejissoru Yusif Ələkbərzadə, prodüseri isə Fuad Hüseynəliyevdir.