Həbsxanada məhkum yoldaşına ülgüclə xəsarət yetirən Azər Şaliyevin cəzası üçqat ağırlaşdırılıb.

AVESTA.AZ "Qafqazinfo"ya istinadən xəbər verir ki, Bakı Apellyasiya Məhkəməsi prokurorun protesti əsasında belə qərar qəbul edib.

38 yaşlı Azər 2014-cü ildən həbsdədir. Həmin vaxt o, quldurluq və narkotik cinayətlərinə görə 13 il müddətinə azadlıqdan məhrum edilmişdi. Cəzasının bitməsinə 3 il qalmış daha bir cinayət törədib. Bu dəfə o, 10 illik məhkum Şəhriyar Baxışəliyevin boyun nahiyəsinə iki dəfə ülgüclə xəsarət yetirib.

Ona qəsdən adam öldürməyə cəhd maddəsi ilə ittiham verilib. İşə Bakı Ağır Cinayətlər Məhkəməsində baxılıb. Amma məhkəmə Azəri bu maddə ilə deyil, qəsdən sağlamlığa az zərər vurma maddəsi ilə təqsirli bilib. Əvvəlki cəzası birləşdirilməklə, ona 5 il azadlıqdan məhrumetmə cəzası təyin edilib.

Həm təqsirləndirilən şəxs, həm də zərərçəkmiş məhkəmənin bu qərarı ilə razılaşıb. Lakin prokuror hökmdən narazı qalaraq apellyasiya protesti verib. Protestdə qeyd olunub ki, Şaliyev zərərçəkmişə iki dəfə xəsarət yetirsə də, hadisənin motivini izah edə bilməyib. Bu səbəbdən hadisə qəsdən adam öldürməyə cəhd kimi qiymətləndirilməlidir.

Hakim Mehriban Qarayevanın sədrlik etdiyi məhkəmə tərkibi protesti təmin edib. Bakı Ağır Cinayətlər Məhkəməsinin hökmü ləğv edilib.

Yeni qərara əsasən, Azər Şaliyev qəsdən adam öldürməyə cəhd etməkdə təqsirli bilinərək 15 il, qalıq cəzası da birləşdirilməklə, 15 il 6 ay müddətinə azadlıqdan məhrum edilib.

Bundan əlavə, o, əvvəlki ciddi rejimli müəssisədən xüsusi rejimli cəzaçəkmə yerinə köçürüləcək.