Bakının Binəqədi rayonunda 47 yaşlı kişi sevgi münasibətində olduğu qadına hədə-qorxu gəlib, onun fotolarını sosial şəbəkədə yayacağı ilə şantaj edib.

BAKU.WS Teleqraf.com-a istinadla xəbər verir ki, hadisə Binəqədi şosesində qeydə alınıb.

Siyəzən rayon sakini, 1978-ci il təvəllüdlü Cəmil Quliyev (adlar şərti göstərilib - red.) həmin ünvanda yaşayan Məlahətə qarşı əxlaqsız hərəkətlər təklif edib. İstəyinə çatmayanda küçədə səs-küy salaraq qadını söyüb.

Zərərçəkmiş Məlahət bununla bağlı hüquq-mühafizə orqanlarına müraciət edib. 4-cü polis bölməsinə müraciət edən Məlahət bildirib ki, Cəmil uzun müddətdir onun mobil telefonuna zəng vurub onu təhqir edir, şəkillərini internet sosial şəbəkələrində nalayiq formada paylaşır: "Sonuncu dəfə mayın 9-da Cəmil mənim yaşadığım ünvana gələrək evimin qarşısında mənə qarşı yüksək səslə söyüşlər, təhqiredici ifadələr işlətdi".

Zərərçəkmiş şəxs izahatının davamında göstərib ki, Cəmili iki ildir tanıyır, onunla yaxın münasibəti olub: "Lakin Cəmil spirtli içki aludəçisi olduğundan artıq bir neçə aydır ki, onunla münasibətimi bitirmişəm. Buna baxmayaraq, Cəmil zənglər edərək, məni təhqir edir, söyür, məni, övladlarımı öldürməklə hədələyir".

İş üzrə təqsirləndirilən şəxs qismində izahat verən Cəmilin sözlərinə görə, həqiqətən də spirtli içkilərdən istifadə edir, yaranmış sərxoşluq halında sevgi münasibətində olduğu Məlahətə qarşı qeyri-adekvat hərəkətlər edib: "Lakin bu hərəkətləri qısqanclığımdan edirəm. Əslində Məlahətə qarşı heç bir hörmətsizlik etmək niyyətim yoxdur. Mayın 9-da yaşadığım Şabran rayonunda ailəvi qonaqlıqda olarkən spirtli içki qəbul etdim. Məlahətlə əlaqə saxlaya bilmədiyimdən əsəbiləşdim. Daha sonra ona zəng vuraraq söyüşlər söydüm. Məni Şabran Rayon Polis Bölməsinə dəvət etdilər. Oradan Binəqədi Rayon Polis İdarəsinin əməkdaşları məni götürərək 4-cü Polis Şöbəsinə gətirdilər. Məlahətə qarşı etdiyim hərəkətlərə görə peşmanam. Ondan üzr istəyirəm".

Binəqədi Rayon Polis İdarəsinin 4-cü Polis Şöbəsində Cəmilin barəsində İnzibati Xətalar Məcəlləsinin 510-cu (xırda xuliqanlıq) maddəsi ilə ittiham elan edilib.

İş baxılması üçün Binəqədi Rayon Məhkəməsinə göndərilib. İşə hakim Samir Nəsibovun sədrliyi ilə baxılıb.

Hakim işi araşdırarkən müəyyən edib ki, xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlərin edilməsi İnzibati Xətalar Məcəlləsinin 510-cu maddəsi üzrə məsuliyyətə səbəb olur.

Lakin müəyyən olunub ki, inzibati xəta haqqında protokolda həmin maddə üzrə inzibati xətanın törədilmə tarixi kimi göstərilən 9 may 2025-ci il tarixdə Cəmil nəinki Məlahətin evinin qarşısında, ümumiyyətlə Bakı şəhərində olmayıb. O, zərərçəkmiş şəxsin ünvanına nalayiq ifadələri telefon vasitəsilə zəng edərək işlədib.

Hakim qərarda qeyd edib ki, belə olan halda inzibati xəta hadisəsi mövcud olmayan hesab edilməlidir.

Bu səbəbdən Cəmilin barəsində olan inzibati xəta üzrə protokolun icraatına xitam verilib. O, məsuliyyətdən azad edilib.