Atasını odlu silahla qətlə yetirməkdə təqsirləndirilən, yetkinlik yaşına çatmayan D.H.-nin cinayət işi üzrə məhkəmə prosesi yekunlaşıb.

AVESTA.AZ APA-ya istinadən xəbər verir ki, Lənkəran Ağır Cinayətlər Məhkəməsində hakim Xamməd Nuriyevin sədrliyi ilə keçirilən prosesdə hökm oxunub.

Hökmə əsasən, təqsirləndirilən şəxsin atası Röyal Hüseynovu öldürməsi sübuta yetirlib və o, 10 il müddətə azadlıqdan məhrum etmə cəzasına məhkum edilib.

Dövlət ittihamçısı da cinayət işi üzrə təqsirləndirilən şəxsin 10 il müddətinə azadlıqdan məhrum edilməsini istəmişdi.

Qeyd edək ki, hadisə ötən il dekabrın 17-də Salyan rayonunun Yeni Uluxanlı kəndində baş verib. Ailə münaqişəsi zəminində yeniyetmə atasını odlu silahla qətlə yetirib, doğrayaraq kənd ərazisindəki kollektora atıb. Ona Cinayət Məcəlləsinin 120.1-ci (qəsdən adam öldürmə) maddəsilə ittiham irəli sürülüb.

Qətlə yetirilən şəxs itkin kimi qələmə verilib

2024-cü il dekabrın 19-da Salyan rayon sakini Röyal Hüseynovun itkin düşməsi ilə bağlı hüquq-mühafizə orqanlarına məlumat verilib. Keçirilən axtarış-əməliyyat nəticəsində şəxsin meyiti hissələrə bölünmüş formada aşkar edilib. Məlum olub ki, o qətlə yetirilib, cinayət işini gizlətmək üçün meyit hissələrə ayıraraq kollektora atılıb.

Ana cinayəti üzərinə götürüb

İlkin araşdırma zamanı Röyal Hüseynovun həyat yoldaşı Mətanət Hüseynovanın Salyan rayonunun Yeni Uluxanlı kəndində işlədikləri fermada aralarında yaranmış mübahisə zamanı əri Röyal Hüseynova ov tüfəngi ilə atəş açaraq qəsdən öldürməsi, növbəti gün cinayət hadisəsini gizlətmək üçün meyiti hissələrə bölərək kənd ərazisindəki kollektora atmasına əsaslı şübhələr müəyyən edilib. Mətanət Hüseynova cinayəti öz üzərinə götürüb.

Əməliyyat çərçivəsində atasını qətlə yetirməkdə şübhəli sayılan yeniyetmə saxlanılıb

Əməliyyat-axtarış tədbirləri nəticəsində əldə olunan sübutlarla məlum olub ki, cinayəti Mətanət Hüseynova deyil, oğlu D.H. törədib. Mətanət Hüseynova sərbəst buraxılıb, oğlu saxlanılıb.

Cinayətin törədilməsi

Məlum olub ki, Röyal Hüseynov ailəsinə zorakılıq göstərib. Bu zorakılıq davamlı və şiddətli olub. Buna dözməyən D.H odlu silahdan atəş açaraq atasını qətlə yetirib və izi itirmək üçün meyiti doğrayaraq kollektora atıb.