Elm adamları uzun illərdir doğum ayı ilə sağlamlıq arasındakı əlaqəni araşdırırlar. Bəzi araşdırmalar göstərir ki, uşaqların hansı ayda dünyaya gəlməsi onların immunitet sisteminə, xəstəlik risklərinə və hətta ömür uzunluğuna müəyyən təsir göstərə bilər. Bu nəticələr doğum ayının təkcə təqvimdə bir tarix deyil, həm də uşağın gələcək sağlamlıq profili ilə bağlı ipucu ola biləcəyini göstərir.

AVESTA.AZ xəbər verir ki, yeni aparılan beynəlxalq tədqiqatlar doğum ayının uşaqların uzunmüddətli sağlamlığına təsir göstərə biləcəyini ortaya qoyur.

Columbia Universitetinin araşdırmasına görə, may ayında doğulan uşaqların ümumi xəstəlik riski digər aylarda doğulanlara nisbətən daha azdır. Əksinə, oktyabr doğumlarında müəyyən xəstəliklərin riski bir qədər yüksək müşahidə olunub.

PNAS elmi jurnalında yayımlanan uzunmüddətli araşdırma isə göstərib ki, payız aylarında - xüsusilə sentyabr və noyabrda doğulan insanların yüz yaşa qədər yaşamaq ehtimalı daha yüksəkdir. Bu dövrdə doğulanların orqanizmi iqlim və mövsüm dəyişiklərinə qarşı daha dayanıqlı olur.

Finlandiyada aparılan başqa bir tədqiqat isə mövsümi fərqləri önə çəkib. Məlum olub ki, yay aylarında doğulan uşaqlar arasında astma və allergik rinit kimi xəstəliklər daha az yayılıb. Payız və qış aylarında doğulan uşaqlarda isə bu xəstəliklərin riski nisbətən yüksəkdir. Alimlər bunu hamiləlik dövründəki vitamin D səviyyəsi, virus infeksiyaları və ətraf mühit faktorları ilə əlaqələndirir.

BMJ (British Medical Journal) mütəxəssisləri bildirirlər ki, doğum ayı sağlamlığa müəyyən təsir göstərə bilər, lakin bu təsirlər genetik, sosial və ekoloji amillərlə birlikdə qiymətləndirilməlidir. Onların sözlərinə görə, uşağın sağlam böyüməsi üçün əsas amil düzgün qidalanma, gigiyena və ailə şəraitidir.