Bakıda “XXI əsrdə dövlət qulluğunda nailiyyət əsaslı insan resurslarının idarə edilməsi” adlı beynəlxalq seminar keçirilir.

“AVESTA.AZ” xəbər verir ki, seminar Dövlət İmtahan Mərkəzi (DİM), Dövlət Qulluğu üzrə Astana Regional Xab və Birləşmiş Millətlər Təşkilatının Beynəlxalq Dövlət Qulluğu Komissiyasının birgə təşkilatçılığı ilə baş tutub.

Tədbirdə DİM-in rəhbər şəxsləri, BMT-nin Dövlət Qulluğu Komissiyasının nümayəndəsi, Dövlət Qulluğu üzrə Astana Regional Xabın Rəhbər Komitəsinin sədri, Qazaxıstanın Dövlət Qulluğu Məsələləri üzrə Agentliyinin sədri, Ukraynanın Dövlət Qulluğu üzrə Milli Agentliyinin rəhbəri, həmçinin Azərbaycan Respublikasının dövlət orqanlarının insan resursları üzrə struktur bölmələrinin rəhbərləri, millət vəkilləri bir sıra digər vəzifəli şəxslər iştirak edirlər.

Seminarda çıxış edən DİM sədri Məleykə Abbaszadə bildirib ki, dövlət qulluğu sahəsində səriştə modelinə keçid daha peşəkar, bacarıqlı, şəxsi keyfiyyətləri yüksək olan vətəndaşların dövlət qulluğuna cəlb olunmasını təmin edir: “Bu da nəticədə dövlət qulluğunun səmərəliliyini və vətəndaşlara dövlət adından göstərilən xidmətlərin şəffaflığını və effektivliyini göstərir. İnsan kapitalından səmərəli istifadə olunması, dövlət qulluqçularının potensialının artırılması, dövlət orqanlarında vakant vəzifələrin tutulması, eləcə də dövlət qulluqçularının fasiləsiz peşəkar inkişafı dövlət qulluğunda islahatların aparılması prosesində mövcud olan aktual məsələlərdir”.

O qeyd edib ki, seminarın məqsədi insan resurslarının idarə edilməsi siyasətində və proseslərində yaxşı təcrübələr haqqında müvafiq bilik və məlumatı paylaşmaq, eyni zamanda Xab iştirakçısı olan ölkələrin dövlət orqanlarının insan resursları üzrə rəhbər şəxsləri arasında insan resurslarının strateji idarə edilməsinə dair müasir təcrübələr barəsində müzakirələr aparmaqdır: “Bugünkü seminarın mövzusu bizim ölkələrdə dövlət qulluğu sahəsində baş verən islahatlarla və yeniliklərlə birbaşa əlaqəlidir. Belə ki, dövlət idarəetmə sistemində start verilmiş struktur və kadr islahatları standartların dəyişməsini sübut edir”.

Seminarda Birləşmiş Millətlər Təşkilatının Beynəlxalq Dövlət Qulluğu Komissiyasının ekspertləri tərəfindən mövzu barədə təqdimatlar edilməsi və müzakirələr aparılması planlaşdırılır.