ABŞ-nin daxili təhlükəsizlik naziri Kristi Noem Fələstinə dəstək aksiyalarında adı önə çıxan Harvard Universitetinə qarşı sərt mövqe nümayiş etdirib.

AVESTA.AZ trt haber-ə istinadən xəbər verir ki, o, universitetə məktubla müraciət edərək xarici tələbələrin qanunsuz və zorakı hərəkətlərə qarışıb-qarışmadığına dair məlumatların 30 aprelə qədər təqdim olunmasını tələb edib.

Noem xəbərdarlıq edib ki, Harvard bu hesabat öhdəliklərinə tam əməl etməzsə, xarici tələbə qəbul hüququnu itirə və SEVP sertifikatından məhrum qala bilər.

Universitet rəhbərliyi isə cavab olaraq, qanuna əməl edəcəklərini, lakin konstitusiya ilə təmin olunmuş hüquqlardan vaz keçməyəcəklərini bildirib.

Qeyd edək ki, Tramp son açıqlamasında Harvard Universitetini "yolunu azmış" adlandıraraq, artıq dünyanın ən yaxşı ali məktəbləri sırasında olmaması lazım olduğunu deyib.